ඉරානය, අමෙරිකාව සහ ඊශ්රායලය අතර පවතින උග්ර යුදමය තත්ත්වය හේතුවෙන් ලොව නැගී එන ආර්ථිකයන් සහිත රටවල (Emerging Market Economies) මූල්ය ස්ථාවරත්වයට දැඩි තර්ජනයක් එල්ල විය හැකි බව ජාත්යන්තර ණය ශ්රේණිගත කිරීමේ ආයතනයක් වන ෆිච් රේටින්ග්ස් (Fitch Ratings) පවසයි. “ඉරාන ගැටුම නැගී එන වෙළඳපොළවල් සඳහා නව ණය අවදානම් මතු කරයි” යන මැයෙන් නිකුත් කළ වාර්තාවක් මගින් ඔවුන් පෙන්වා දෙන්නේ, ගල්ෆ් කලාපයෙන් සිදුවන බලශක්ති සැපයුම් අඩාල වුවහොත් බලශක්ති ආනයනය මත යැපෙන රටවලට බරපතල ප්රතිවිපාකවලට මුහුණ දීමට සිදුවන බවයි.
විශේෂයෙන්ම බලශක්ති පිරිවැය ඉහළ යාම නිසා අදාළ රටවල මූල්ය පීඩනය සහ ගෙවුම් ශේෂ අර්බුද උග්ර විය හැකි බව ෆිච් ආයතනය අවධාරණය කරයි. මේ හරහා ගෝලීය ආයෝජක විශ්වාසය බිඳ වැටීමක් ද සිදු විය හැකි අතර, එය නැගී එන වෙළඳපොළවල විදේශ ප්රේෂණ, විනිමය අනුපාත සහ ජාත්යන්තර මූල්ය පහසුකම් ලබා ගැනීමේ හැකියාව කෙරෙහි සෘජුව බලපානු ඇත. බලශක්ති මිල ඉහළ යාම හමුවේ උද්ධමනය පාලනය කිරීම සඳහා ලොව පුරා මහ බැංකුවලට සිය මූල්ය ප්රතිපත්ති දැඩි කිරීමට ද සිදුවනු ඇතැයි එම වාර්තාවේ දැක්වේ.
මෙම ගැටුම හේතුවෙන් අමෙරිකානු ඩොලරය තවදුරටත් ශක්තිමත් වීම සහ ජාත්යන්තර ණය නිකුත් කිරීමේ වෙළඳපොළ දුර්වල වීම සිදුවිය හැකි බව ෆිච් ආයතනය පුරෝකථනය කරයි. ඉන්දියාව වැනි විශාල ආර්ථිකයන් සහිත රටවල ද දළ දේශීය නිෂ්පාදිතයෙන් 3% කට වඩා වැඩි ප්රමාණයක් ඉන්ධන ආනයනය සඳහා වැයවන බැවින්, ගෝලීය බලශක්ති මිල ඉහළ යාම එම රටවලට ද සෘජු බලපෑමක් එල්ල කරනු ඇත. භූ දේශපාලනික අවදානම් සහ ආර්ථික ස්ථාවරත්වය අතර පවතින මෙම අන්තර් සම්බන්ධතාවය හේතුවෙන් සංවේදී ආර්ථිකයන් සහිත රටවල් දැඩි අවදානමකට ලක්ව ඇති බව ෆිච් රේටින්ග්ස් වැඩිදුරටත් සඳහන් කරයි.
