ඉරාන ගැටුම හේතුවෙන් බලශක්ති ආනයනය, විදේශ ප්රේෂණ, රාජ්ය සහනාධාර සහ විනිමය අනුපාත වැනි අංශ ඔස්සේ නැගී එන වෙළඳපොළවල් (Emerging Markets) සහිත රටවලට නව අභියෝග රැසක් එල්ල වී ඇති බව ෆිට්ච් රේටින්ග්ස් (Fitch Ratings) ආයතනය පෙන්වා දෙයි. විශේෂයෙන්ම හෝර්මුස් සමුද්ර සන්ධිය (Strait of Hormuz) මාසයකට වඩා වැඩි කාලයක් වසා තැබුණහොත් හෝ කලාපීය තෙල් නිෂ්පාදන යටිතල පහසුකම්වලට බරපතල හානි සිදුවුවහොත්, මෙම රටවල ණය ශ්රේණිගත කිරීම් කෙරෙහි එය සෘජුව බලපානු ඇත.
බලශක්ති ආනයන පිරිවැය ඉහළ යාම මෙම ගැටුමේ වඩාත්ම සෘජු බලපෑමයි. ෆිට්ච් ආයතනයට අනුව චිලී, ඊජිප්තුව, ඉන්දියාව, මොරොක්කෝව, පකිස්ථානය, පිලිපීනය, තායිලන්තය සහ යුක්රේනය වැනි රටවල ෆොසිල ඉන්ධන ආනයන පිරිවැය දළ දේශීය නිෂ්පාදිතයෙන් (GDP) 3%කට වඩා වැඩි අගයක් ගනී. පකිස්ථානය වැනි දැනටමත් මූල්ය අර්බුදවලට මුහුණ දී සිටින රටවලට මෙම පිරිවැය දරා ගැනීම අතිශය දුෂ්කර වනු ඇත.
එමෙන්ම ගල්ෆ් කලාපයේ සංචාරක සහ සැපයුම් දාම බිඳවැටීම නිසා එම කලාපයේ සේවය කරන විදේශිකයන්ගෙන් ලැබෙන ප්රේෂණ (Remittances) මත යැපෙන දකුණු ආසියාතික රටවලට ද දැඩි බලපෑම් එල්ල වේ. තවද, ඉහළ යන තෙල් මිල හමුවේ පාරිභෝගිකයා ආරක්ෂා කිරීමට සහනාධාර ලබා දෙන රජයන්ට සිය මූල්ය පරතරය කළමනාකරණය කර ගැනීම අභියෝගයක් වනු ඇත. මෙම තත්ත්වය හමුවේ ඇමරිකානු ඩොලරය ශක්තිමත් වීම නිසා නැගී එන රටවල ණය පියවීමේ පිරිවැය ද ඉහළ යනු ඇතැයි අපේක්ෂා කෙරේ.
කෙසේ වෙතත්, ඇන්ගෝලාව, බ්රසීලය, නයිජීරියාව සහ ඉක්වදෝරය වැනි ගල්ෆ් කලාපයෙන් පිටත පිහිටි හයිඩ්රොකාබන් අපනයනය කරන රටවලට මෙම තෙල් මිල ඉහළ යාම ආදායම් වර්ධනය කර ගැනීමට ලැබෙන වාසනාවන්ත අවස්ථාවක් විය හැකිය. මීට අමතරව, පොහොර නිෂ්පාදනය සඳහා අවශ්ය අමුද්රව්ය සැපයුම අඩාල වීම හරහා ගෝලීය ආහාර උද්ධමනය කෙරෙහි ද මෙම අර්බුදය මධ්යකාලීන බලපෑමක් එල්ල කරනු ඇත.
