ශ්රී ලංකාවේ ප්රථම පෞද්ගලික ජාත්යන්තර ගුවන් සේවය වන ෆිට්ස් එයාර් (FitsAir), මෙරට ප්රමුඛ පෙළේ සංචාරක ව්යාපාරික හවුල්කරුවන් වන ‘සිටි ඔෆ් ඩ්රීම්ස් ශ්රී ලංකා’ (City of Dreams Sri Lanka), ‘සිනමන් හොටෙල්ස් ඇන්ඩ් රිසෝට්ස්’ (Cinnamon Hotels & Resorts) සහ ‘වෝකර්ස් ටුවර්ස්’ (Walkers Tours) සමඟ එක්ව අහමදාබාද් සහ කොළඹ අතර සෘජු මගී ගුවන් සේවා මැයි 15 වැනිදා සිට ආරම්භ කිරීමට පියවර ගෙන තිබේ. සතියකට තෙවරක් ක්රියාත්මක වන මෙම ගුවන් සේවය මගින් ඉන්දීය සංචාරකයන්ට මෙරටට පැමිණීම වඩාත් පහසු කරලීම අරමුණු කෙරේ.
විශේෂයෙන්ම ඉන්දියාවේ ගුජරාට් ප්රාන්තය ශ්රී ලංකාවට වේගයෙන් වර්ධනය වන සංචාරක වෙළඳපොළක් ලෙස හඳුනාගෙන ඇති අතර, මෙම නව ගුවන් මංපෙත් හරහා බටහිර ඉන්දියාව සහ ශ්රී ලංකාව අතර සංචාරක සබඳතා තවදුරටත් ශක්තිමත් වනු ඇතැයි අපේක්ෂා කෙරේ. මීට අමතරව, කොළඹ පිහිටි ‘සිටි ඔෆ් ඩ්රීම්ස්’ ඒකාබද්ධ නිවාඩු නිකේතන ව්යාපෘතිය කලාපීය විනෝදාස්වාද සහ සංචාරක මධ්යස්ථානයක් ලෙස ප්රවර්ධනය කිරීමට ද මෙමගින් සහය හිමි වේ.
මෙම නව ගුවන් සේවය සමඟ විශේෂ සංචාරක පැකේජ ද හඳුන්වා දී ඇති අතර, ඉන්දීය රුපියල් 55,555 සිට ආරම්භ වන එම පැකේජවලට දෙපාර්ශවයේම ගුවන් ගාස්තු, ‘සිටි ඔෆ් ඩ්රීම්ස්’ හි නවාතැන් පහසුකම් සහ ප්රවාහන පහසුකම් ඇතුළත් වේ. මීට අමතරව කොළඹ නවාතැන් ගන්නා සංචාරකයන්ට නුවර සහ දකුණු වෙරළ තීරයේ පිහිටි සිනමන් නිවාඩු නිකේතන වෙත ද ගමන් කිරීමට අවස්ථාව සැලසේ.
ඉන්දියාව මෙරට සංචාරක ක්ෂේත්රයේ වැදගත්ම වෙළඳපොළක් වන අතර, අහමදාබාද් වැනි වාණිජ නගර සමඟ මෙවැනි සෘජු සබඳතා ගොඩනැගීම හරහා සංචාරකයන්ට වඩාත් ගුණාත්මක සහ කාර්යක්ෂම සේවාවක් ලබා දිය හැකි බව ෆිට්ස් එයාර් සහ සිනමන් හොටෙල්ස් බලධාරීහු පෙන්වා දෙති. ෆිට්ස් එයාර් හි ජාත්යන්තර ජාලය පුළුල් කිරීමේ තවත් වැදගත් පියවරක් ලෙස ද මෙය සැලකේ.
