මියගිය අමෙරිකානු ලිංගික අපරාධකරු ජෙෆ්රි එප්ස්ටයින්ගේ ක්රියාකාරකම්වලට සම්බන්ධ ලිපිගොනු රැසක් ප්රසිද්ධියට පත්වීමත් සමඟ, ප්රංශය ඔහුට සම්බන්ධ පුද්ගලයින්ගේ මිනිස් ජාවාරම් සහ මූල්ය වංචා පිළිබඳ පුළුල් පරීක්ෂණ දෙකක් ආරම්භ කර තිබේ. පැරිස් නඩු පවරන්නියක වන ලෝර් බෙකුවෝ (Laure Beccuau) පවසන්නේ එක් පරීක්ෂණයක් මිනිස් ජාවාරම කෙරෙහිත්, අනෙක් පරීක්ෂණය මුදල් විශුද්ධිකරණය, දූෂණය සහ බදු වංචා කෙරෙහිත් අවධානය යොමු කරන බවයි. එප්ස්ටයින්ට පැරිස් නුවර සුඛෝපභෝගී මහල් නිවාසයක් හිමිව තිබූ අතර ඔහු නිතර ප්රංශයට පැමිණි බවට සාක්ෂි හමුවී ඇති බැවින් ප්රංශ වැසියන් ද මෙම අපරාධවලට සම්බන්ධ දැයි සෙවීම මෙහි අරමුණයි.
මෙම පරීක්ෂණ යටතේ හිටපු සංස්කෘතික අමාත්ය ජැක් ලැන්ග් (Jack Lang) සහ ඔහුගේ දියණියට එරෙහිව බදු වංචා සම්බන්ධයෙන් මූලික විමර්ශනයක් දැනටමත් ආරම්භ කර ඇත. එසේම එක්සත් ජාතීන්ගේ සංවිධානයේ ලේඛන එප්ස්ටයින් වෙත මාරු කළ බවට සැකකෙරෙන ප්රංශ රාජ්ය තාන්ත්රිකයෙකු පිළිබඳව ද කරුණු විමසමින් පවතී. එක්සත් ජාතීන්ගේ මානව හිමිකම් කවුන්සිලයේ ස්වාධීන විශේෂඥ මණ්ඩලයක් පෙන්වා දෙන්නේ එප්ස්ටයින්ගේ ජාලය ලොව පුරා විසිරුණු අපරාධ ව්යාපාරයක් බවත්, එමගින් සිදුවූ අපරාධ මනුෂ්යත්වයට එරෙහි අපරාධ ලෙස සැලකිය හැකි බවත්ය.
