ඕස්ට්රේලියාව සහ ඉන්දුනීසියාව වැනි රටවල් ගෙන ඇති පියවර අනුගමනය කරමින්, වයස අවුරුදු 15ට අඩු දරුවන්ට සමාජ මාධ්ය භාවිතය තහනම් කරන ප්රථම යුරෝපා සංගම් රට බවට පත්වීමට ප්රංශ ජනාධිපති එමානුවෙල් මැක්රොන් (Emmanuel Macron) බලාපොරොත්තු වේ. TikTok, Snapchat සහ Instagram වැනි වේදිකා නව යොවුන් වියේ පසුවන්නන්ගේ, විශේෂයෙන්ම ගැහැණු ළමයින්ගේ මානසික සෞඛ්යයට අහිතකර ලෙස බලපාන බවට එරට මහජන සෞඛ්ය ආයතන අනතුරු ඇඟවීම මෙයට ප්රධාන හේතුව වී තිබේ.
ප්රංශ පාර්ලිමේන්තුවේ පහළ මන්ත්රී මණ්ඩලය පසුගිය ජනවාරි මාසයේදී මෙම පනත සම්මත කළ අතර, ඒ අනුව වයස අවුරුදු 15ට අඩු නව පරිශීලකයන් ලියාපදිංචි කර ගැනීම ප්රතික්ෂේප කිරීමටත්, දැනට පවතින එම වයස් සීමාවේ ගිණුම් අත්හිටුවීමටත් සමාජ මාධ්ය ආයතනවලට සිදු වේ. මීට අමතරව උසස් විද්යාල තුළ ජංගම දුරකථන භාවිතය තහනම් කිරීමට ද රජය සැලසුම් කර ඇති අතර, මෙම නීති ලබන සැප්තැම්බර් මාසයේ සිට ක්රියාත්මක කිරීමට අපේක්ෂිතය.
කෙසේ වෙතත්, ප්රංශ සෙනෙට් මණ්ඩලය (Senate) මෙම පනතට ඇතැම් සංශෝධන ඉදිරිපත් කර ඇති අතර, අධ්යාපනික පද්ධති සහ විශ්වකෝෂ වැනි වෙබ් අඩවි මෙයින් නිදහස් කරන ලෙස ඔවුන් යෝජනා කර ඇත. ළමයින්ගේ හැඟීම් චීන ඇල්ගොරිතම හෝ ඇමෙරිකානු වේදිකා මගින් මෙහෙයවීමට ඉඩ දිය නොහැකි බව ජනාධිපති මැක්රොන් අවධාරණය කරයි. එහෙත් විවේචකයන් පවසන්නේ මෙය ප්රායෝගිකව ක්රියාත්මක කිරීම අපහසු බවත්, ළමයින් තහනම් කරනවා වෙනුවට එම සමාජ මාධ්ය ආයතන වගකීම් සහගතව බැඳ තැබිය යුතු බවත්ය.
