එක්සත් අරාබි එමීර් රාජ්යයේ ෆුජයිරා නුවර පැවැත්වුණු ATP චැලෙන්ජර් ටෙනිස් තරගාවලිය අතරතුර එල්ල වූ ඉරාන ඩ්රෝන ප්රහාරයක් හේතුවෙන් ක්රීඩකයින් සහ නිලධාරීන් මහත් භීතියට පත්ව පිටියෙන් ඉවතට දිව යන පුවතක් වාර්තා වේ. ඊශ්රායලය සහ ඇමරිකාව ඉරානයට එල්ල කළ ප්රහාරවලට ප්රතිචාර වශයෙන් පසුගිය දින තුන තිස්සේ එමීර් රාජ්යය වෙත එල්ල වන ප්රහාර මාලාවක කොටසක් ලෙස මෙම ඩ්රෝන යානය එල්ල වී ඇති අතර, ගුවන් ආරක්ෂක පද්ධති මගින් එය විනාශ කිරීමේදී කඩා වැටුණු සුන්බුන් හේතුවෙන් ක්රීඩාංගණයේ සිට කිලෝමීටර් 10ක් දුරින් පිහිටි තෙල් පර්යන්තයක දැවැන්ත ගින්නක් හටගෙන තිබේ. ජපානයේ හයාටෝ මට්සුඕකා සහ රුසියාවේ ඩැනිල් ඔස්ටපෙන්කොව් අතර තරගය පැවැත්වෙමින් තිබියදී බලධාරීන් ලබා දුන් උපදෙස් මත ක්රීඩකයින් සිය බඩු බාහිරාදිය පවා අතහැර පිටියෙන් ඉවතට දිව යන අයුරු සජීවී දර්ශනවල සටහන් වී තිබුණි.
මෙම අනතුරුදායක තත්ත්වය හමුවේ ATP ආයතනය විසින් ෆුජයිරාහි පැවැත්වීමට නියමිතව තිබූ සියලුම තරගාවලි වහාම ක්රියාත්මක වන පරිදි අවලංගු කිරීමට පියවර ගෙන ඇත. ක්රීඩකයින්ගේ සහ කාර්ය මණ්ඩලයේ ආරක්ෂාව තමන්ගේ ඉහළම ප්රමුඛතාව බවත්, දැනට ගුවන් ගමන් අත්හිටුවා තිබීම නිසා ඩුබායි සහ ෆුජයිරාහි සිරවී සිටින ක්රීඩකයින්ට අවශ්ය නවාතැන් සහ පහසුකම් ලබා දෙන බවත් එම ආයතනය නිවේදනය කළේය. හිටපු ලොව අංක එකේ ක්රීඩක ඩැනිල් මෙද්විඩෙව් ඇතුළු ක්රීඩකයින් පිරිසක් මේ වන විටත් කලාපයේ ගුවන් සීමා වසා දැමීම නිසා සිරවී සිටින අතර, කැලිෆෝනියාවේ පැවැත්වෙන ඉන්දියන් වේල්ස් (Indian Wells) තරගාවලියට සහභාගී වීම සඳහා ඔවුන් ඕමානය හරහා පෞද්ගලික ගුවන් යානා මගින් පිටව යාමට ඇති හැකියාව පිළිබඳව මේ වන විට අවධානය යොමු වෙමින් පවතී.
