විදේශගතව සිට මෙරට අපරාධ ජාලයන් මෙහෙයවන සංවිධානාත්මක අපරාධකරුවන් වන ‘රත්මලානේ ඇල්ටෝ ධර්මේ’ සහ ‘දෙහිවල සැන්ඩ්රෝ’ යන අයගේ සමීපතමයන් 15 දෙනෙකු ගල්කිස්ස කොට්ඨාස අපරාධ විමර්ශන කාර්යාංශය මගින් අත්අඩංගුවට ගෙන තිබේ. රත්මලාන අරලිය නිවාස සංකීර්ණය කේන්ද්ර කරගනිමින් සිදුකළ විශේෂ සෝදිසි මෙහෙයුමකදී මෙම පිරිස කොටු කරගත් අතර, ඔවුන් සන්තකයේ තිබී අඩි 4ක් පමණ දිගැති කඩු 4ක්, උල් පිහියක්, ලක්ෂ 24ක් පමණ වටිනා හෙරොයින් සහ අයිස් මත්ද්රව්ය තොගයක් ද පොලිස් භාරයට ගෙන ඇත. අත්අඩංගුවට ගත් පිරිස අතර අධිකරණය මගහැර සිටි වරෙන්තුකාරියක ද සිටින බව වාර්තා වේ.
පොලිස් විමර්ශනවලට අනුව, මෙම කණ්ඩායම පසුගිය කාලසීමාව තුළ ගල්කිස්ස, කොහුවල සහ දෙහිවල ප්රදේශවල සිදුවූ මනුෂ්ය ඝාතන සහ කපා කොටා තුවාල සිදුකිරීම් රැසකට සම්බන්ධ වී ඇති බවට සැක කෙරේ. අත්අඩංගුවට ගත් සැකකරුවන් අවුරුදු 18ත් 40ත් අතර වයස්වල පසුවන රත්මලාන ප්රදේශයේ පදිංචිකරුවන් වන අතර, ඔවුන් සන්තකයේ තිබී සොයාගත් ජංගම දුරකථන සහ මුදල් පසුම්බි සම්බන්ධයෙන් ද පුළුල් පරීක්ෂණ ක්රියාත්මකය. මෙම ආයුධ මගින් මීට පෙර සිදුකළ අපරාධ රැසක තොරතුරු අනාවරණය කරගත හැකි වනු ඇතැයි පොලිසිය විශ්වාසය පළ කරයි.
සැකකරුවන් ගල්කිස්ස අධිකරණයට ඉදිරිපත් කර රැඳවුම් නියෝග ලබාගැනීමට නියමිතව ඇති අතර, විදේශගතව සිටින ප්රධාන ජාවාරම්කරුවන් දෙදෙනා සමඟ මොවුන් පවත්වාගෙන ගිය සබඳතා පිළිබඳව අපරාධ විමර්ශන අංශ වැඩිදුර ප්රශ්න කිරීම් සිදු කරයි. මෙම සාර්ථක වැටලීමත් සමඟ දකුණු කොළඹ ආශ්රිත ප්රදේශවල ක්රියාත්මක වූ පාතාල සහ මත්ද්රව්ය ජාලයන්ට ප්රබල පහරක් එල්ල වී ඇති බව උසස් පොලිස් නිලධාරියෙක් සඳහන් කළේය. ඉදිරි දින කිහිපය තුළ මෙම ජාලයට සම්බන්ධ තවත් සැකකරුවන් කිහිපදෙනෙකු අත්අඩංගුවට ගැනීමට නියමිතය.
උපුටා ගැනීම: එච්.එම්. ධර්මපාල සහ ප්රදීප් කුමාර
