ගාල්ල මුහුදු තීරයේදී ඇමෙරිකානු සබ්මැරීන ප්රහාරයකින් ගිලී ගිය ඉරාන නාවික හමුදාවට අයත් ‘අයිරිෂ් ඩෙනා’ (IRIS Dena) නෞකාව සම්බන්ධයෙන් විපක්ෂ නායක සජිත් ප්රේමදාස මහතා පාර්ලිමේන්තුවේදී බරපතල අනාවරණයක් සිදු කරමින් ප්රකාශ කළේ එම නෞකාව තුළ පුපුරා නොගිය විශාල ආයුධ ප්රමාණයක් පවතින බවයි. විදේශීය සබ්මැරීනයක් මෙරට මුහුදු සීමාවට පැමිණ ප්රහාරයක් එල්ල කර යන තෙක් ආරක්ෂක අංශවලට එය හඳුනා ගැනීමට නොහැකි වීම ජාතික ආරක්ෂාව පිළිබඳ පවතින බරපතල දුර්වලතාවයක් බවත් මෙරට ස්වෛරීභාවයට ඉන් දැඩි තර්ජනයක් එල්ල වී ඇති බවත් ඔහු මෙහිදී පෙන්වා දුන්නේය. ගිලී ඇති නෞකාව තුළ පවතින අවි ආයුධ හේතුවෙන් සාගර පරිසරයට සහ කලාපීය ආරක්ෂාවට එල්ල විය හැකි බලපෑම පිළිබඳව රජයේ අවධානය යොමු කළ විපක්ෂ නායකවරයා මැදපෙරදිග යුද වාතාවරණය මෙරට දොරකඩටම පැමිණ ඇති බැවින් ඉදිරියේදී ඉන්ධන, ගෑස් සහ අත්යවශ්ය ඖෂධ මිල අනිවාර්යයෙන්ම ඉහළ යා හැකි බවට අනතුරු ඇඟවීය. මීට අමතරව කොළඹ වරාය ආසන්නයේ ද තවත් ඉරාන නෞකාවක් පවතින බවට තොරතුරු ලැබී ඇති බවත් ඒ පිළිබඳව රජය වහාම කරුණු පැහැදිලි කළ යුතු බවත් ඔහු වැඩිදුරටත් ඉල්ලා සිටි අතර මෙම හෙළිදරව්වත් සමඟ පාර්ලිමේන්තුව තුළ දැඩි උණුසුම් තත්ත්වයක් හටගෙන තිබේ.
