රාත්රී කාලයේදී නිවාස රැසක් බිඳ රුපියල් කෝටියකට ආසන්න වටිනාකමකින් යුත් රන් භාණ්ඩ සහ දේපළ සොරකම් කරන ලද, මත්ද්රව්යවලට තදින්ම ඇබ්බැහි වූ පුද්ගලයින් දෙදෙනෙකු ගම්පහ කොට්ඨාස අපරාධ විමර්ශන කාර්යාංශය මඟින් අත්අඩංගුවට ගෙන තිබේ. ගම්පහ කොට්ඨාස අපරාධ විමර්ශන කාර්යාංශයේ පොලිස් කොස්තාපල් රියැදුරු විජේකෝන් මහතාට ලැබුණු පෞද්ගලික තොරතුරක් මත මෙම සාර්ථක වැටලීම සිදු කර ඇත.
අත්අඩංගුවට ගත් සැකකරුවන් නිට්ටඹුව රන්පොකුණුගම පදිංචි 32 හැවිරිදි අයෙකු සහ අත්තනගල්ල කූරුවමුල්ල ප්රදේශයේ පදිංචි 30 හැවිරිදි අයෙකු බව පොලිසිය පවසයි. සැකකරුවන් ගම්පහ මහේස්ත්රාත් අධිකරණයට ඉදිරිපත් කිරීමෙන් පසු ලබාගත් දින හතක රැඳවුම් නියෝග මත සිදුකළ ප්රශ්න කිරීම්වලදී, නිට්ටඹුව පොලිස් බල ප්රදේශයේ නිවාස රැසක් බිඳ සිදුකළ සොරකම් පිළිබඳ තොරතුරු රැසක් හෙළි කර ගැනීමට හැකි වී තිබේ.
විමර්ශනවලින් අනතුරුව සොරකම් කරන ලද රුපියල් කෝටියකට ආසන්න වටිනාකමකින් යුත් රන් භාණ්ඩ සහ අනෙකුත් දේපළ සොයාගෙන ඇති අතර ඒවා වැඩිදුර විමර්ශන සඳහා ගම්පහ පොලිස් ස්ථානයට ඉදිරිපත් කර ඇත. ගම්පහ කොට්ඨාස අපරාධ විමර්ශන කාර්යාංශයේ ස්ථානාධිපති ජේ.ඒ.එස්.කේ. ජයකොඩි මහතා ඇතුළු නිලධාරීන් කණ්ඩායමක් මෙම විමර්ශන සඳහා එක්ව සිටියහ.
