2019 වසරේ අමෙරිකානු විවෘත (US Open) ශූරතාව දිනාගත් සුපිරි ගොල්ෆ් ක්රීඩක ගේරි වුඩ්ලන්ඩ් (Gary Woodland), මෙවර මාස්ටර්ස් (Masters) තරගාවලියට සහභාගී වන්නේ සිය මානසික සෞඛ්යය කළමනාකරණය කරගැනීම සඳහා විශේෂ ආරක්ෂක විධිවිධාන මධ්යයේය. 2023 වසරේදී මොළයේ ගෙඩියක් ඉවත් කිරීම සඳහා සිදුකළ සැත්කමෙන් පසුව ඔහු පශ්චාත් ව්යසන ක්ලේශී ආතතිය හෙවත් PTSD (Post-traumatic stress disorder) තත්ත්වයෙන් පෙළෙන බව පසුගිය මාසයේදී අනාවරණය කළේය.
මෙම රෝගී තත්ත්වය හේතුවෙන් තරගාවලියක් අතරතුර ක්රීඩා ලෝලීන්, කැමරා ශිල්පීන් හෝ වෙනත් ඕනෑම හදිසි ශබ්දයක් හෝ චලනයක් නිසා තමාට දැඩි අනාරක්ෂිත බවක් සහ බියක් දැනෙන බව 41 හැවිරිදි වුඩ්ලන්ඩ් පවසයි. “මගේ ප්රධානම ගැටලුව දෘශ්යමය වශයෙන් දැනෙන දේයි. මම ආරක්ෂිතයි කියලා මට නිරන්තරයෙන් මතක් කරගන්න නම් ආරක්ෂක නිලධාරියෙක් පෙනෙන මානයේ සිටීම අත්යවශ්යයි,” යනුවෙන් ඔහු සඳහන් කළේය. මේ නිසා සෑම වළක් (Hole) අසලම ආරක්ෂක නිලධාරීන් සිටින ස්ථාන පිළිබඳව ඔහු සහ ඔහුගේ සහායකයා (Caddie) නිරන්තර අවධානයෙන් පසුවෙයි.
පසුගිය මාර්තු මාසයේදී ඔහු හූස්ටන් විවෘත (Houston Open) ශූරතාව දිනා ගැනීමට සමත් වූයේ ද මෙලෙස තරග සංවිධායකයන්ගේ ආරක්ෂක සහය ලබාගැනීම නිසා බව ඔහු කියා සිටියේය. හූස්ටන් තරගාවලිය අතරතුර එක් අවස්ථාවකදී යමෙකු තමා මරා දැමීමට උත්සාහ කරන බවට දැඩි බියක් ඇතිවූ බවත්, පසුව ආරක්ෂක කණ්ඩායම තමා පිටුපස සිටින බව දැකීමෙන් එම බිය පාලනය කරගත් බවත් ඔහු සිහිපත් කළේය. මීට පෙර මෙම තත්ත්වය රහසක්ව තබාගෙන තනිවම සටන් කළ ද, දැන් ඒ පිළිබඳව ප්රසිද්ධියේ කතා කිරීම තමාට මානසිකව විශාල ශක්තියක් වූ බව වුඩ්ලන්ඩ් වැඩිදුරටත් පැවසීය.
