ඇමරිකාවේ ඇලබාමා ප්රාන්තයේ එන්ටර්ප්රයිස් (Enterprise) නගරයේ පදිංචි අවුරුදු දෙකක් වයසැති ජෙනසිස් රීඩ් (Genesis Reid) දැරිය අතුරුදන් වීමේ සිද්ධිය සම්බන්ධයෙන් ඇගේ මව වන ඒඩ්රියන් රීඩ් (Adrienne Reid) අත්අඩංගුවට ගෙන තිබේ. පෙබරවාරි 16 වනදා අලුයම 3:00ට පමණ දැරිය අතුරුදන් වූ බව මව විසින් පොලීසියට පැමිණිලි කර තිබුණද, විමර්ශනවලදී හෙළි වී ඇත්තේ දැරිය සති කිහිපයක සිට දැක නොමැති බවයි. ඒ අනුව සිද්ධිය සම්බන්ධයෙන් ව්යාජ තොරතුරු වාර්තා කිරීමේ චෝදනාව මත මව අත්අඩංගුවට ගෙන ඇති අතර ඇයට ඇප ලබාදීම ද අධිකරණය ප්රතික්ෂේප කර ඇත.
බදාදා (18) පැවැති මාධ්ය හමුවකදී එන්ටර්ප්රයිස් පොලීසිය සඳහන් කළේ දැරිය සෙවීම සඳහා මළසිරුරු හඳුනාගත හැකි විශේෂ පුහුණු සුනඛයන් (Cadaver dogs) ඇය පදිංචිව සිටි නිවස අවට සෝදිසි මෙහෙයුම් සඳහා යෙදවූ බවයි. “දැරිය සිටින තැන දන්නා එකම පුද්ගලයා ඒඩ්රියන් රීඩ් පමණයි” යනුවෙන් කොෆී ප්රාන්තයේ දිස්ත්රික් නීතිඥ ජේම්ස් ටාබොක්ස් මෙහිදී ප්රකාශ කළේය.
මෙම අතුරුදන් වීමට අදාළව ‘මොරියා’ (Moriah) නැමැති කළු ජාතික කාන්තාවක පිළිබඳව ද පොලීසිය අවධානය යොමු කර තිබේ. ඇය දැනට සැකකාරියක ලෙස නම් කර නොමැති වුවත්, දැරිය පිළිබඳව වැදගත් තොරතුරු ඇය සතුව තිබිය හැකි බවට පොලීසිය සැක කරයි. දැරිය සොයා ගැනීම සඳහා ක්රියාත්මක මෙහෙයුම් අඛණ්ඩව සිදු කරන බව එන්ටර්ප්රයිස් පොලිස් ප්රධානී මයිකල් මූර් අවධාරණය කළේය.
