ඉරානය විසින් මැදපෙරදිග කලාපයේ තෙල් සහ ස්වභාවික වායු යටිතල පහසුකම් ඉලක්ක කර ගනිමින් දියත් කර ඇති ප්රහාර මාලාව හේතුවෙන් ගෝලීය බලශක්ති සැපයුමට දැඩි බලපෑමක් එල්ල වී තිබේ. මෙම ප්රහාරයන්හි ප්රතිඵලයක් ලෙස ලොව ප්රධානතම ද්රව ස්වභාවික වායු (LNG) සැපයුම්කරුවෙකු වන කටාර් රාජ්යයේ අපනයන ධාරිතාව 17%කින් පමණ පහත වැටී ඇති අතර එම හානි යථා තත්ත්වයට පත් කිරීමට වසර පහක පමණ කාලයක් ගතවනු ඇතැයි ගණන් බලා තිබේ.
කටාර්හි රාස් ලැෆාන් (Ras Laffan) LNG මධ්යස්ථානයට එල්ල වූ මිසයිල ප්රහාර හේතුවෙන් එරටට වසරකට ඇමෙරිකානු ඩොලර් බිලියන 20ක පමණ මූල්ය අලාභයක් සිදුවනු ඇතැයි අපේක්ෂිතය. මෙම දීර්ඝකාලීන සැපයුම් අඩාල වීම හේතුවෙන් යුරෝපයේ ස්වභාවික වායු මිල පසුගිය මාසය තුළ දෙගුණයකින් ඉහළ ගොස් ඇති අතර ඊයේ දිනයේ පමණක් එය 17%ක වර්ධනයක් පෙන්නුම් කළේය.
සවුදි අරාබියේ SAMREF පිරිපහදුවට සහ රාස් තනුරා (Ras Tanura) පිරිපහදුවට එල්ල වූ ප්රහාර හේතුවෙන් එරට දෛනික තෙල් නිෂ්පාදනය බැරල් මිලියන 2කින් පමණ පහත වැටී තිබේ. මේ වන විට සවුදි අරාබියේ දෛනික නිෂ්පාදනය බැරල් මිලියන 8ක් දක්වා අඩු වී ඇති අතර එක්සත් අරාබි එමීර් රාජ්යයේ ෆුජයිරා (Fujairah) තෙල් මධ්යස්ථානයෙන් ද දුම් පටල නැගෙන අයුරු වාර්තා වී ඇත.
යුද්ධය ආරම්භ වූ දින සිට මේ දක්වා ලෝක වෙළඳපොළේ Brent බොරතෙල් මිල 60%කින් පමණ ඉහළ ගොස් බැරලයක් ඩොලර් 119ක් වැනි ඉහළ අගයක් වාර්තා කළේය. මෙම තත්ත්වය පාලනය කිරීම සඳහා ඉරානයට පනවා ඇති තෙල් සම්බාධක ඉවත් කිරීමට සහ ඇමෙරිකානු සංචිතවලින් තෙල් නිදහස් කිරීමට වොෂින්ටන් පාලනය මේ වන විට අවධානය යොමු කරමින් සිටී.
