වෛද්යවරුන්ගේ වාර්ෂික සහ දුෂ්කර සේවා ස්ථානමාරු ක්රියාවලියට සෞඛ්ය අමාත්යාංශය සහ දේශපාලන අධිකාරිය අත්තනෝමතික ලෙස මැදිහත් වෙමින් පවතින බව රජයේ වෛද්ය නිලධාරීන්ගේ සංගමය විශේෂ මාධ්ය නිවේදනයක් නිකුත් කරමින් චෝදනා කරයි. ආයතන සංග්රහය සහ ස්ථානමාරු මණ්ඩලයේ නෛතික ක්රමවේද උල්ලංඝනය කරමින්, 2025 වාර්ෂික ස්ථානමාරු ලැයිස්තුවෙන් පුරප්පාඩු 78ක් නීති විරෝධී ලෙස ඉවත් කිරීම නිසා වෛද්යවරුන් විශාල පිරිසකට අසාධාරණයක් වී ඇති බව එම සංගමය පෙන්වා දෙයි. මෙම අනීතික ක්රියාකලාපය 2026 වසරේ ස්ථානමාරු සඳහා ද ක්රියාත්මක කිරීමට බලධාරීන් සූදානම් වන බවට ඔවුන් අනතුරු අඟවයි.
දුෂ්කර සේවා ස්ථානවල රාජකාරි කරන වෛද්යවරුන් දිරිගැන්වීම සඳහා වසරක සේවා කාලයකින් පසු ලබාදෙන විශේෂ ස්ථානමාරු අවස්ථාව, කිසිදු එකඟතාවයකින් තොරව වසර දෙකක් දක්වා දීර්ඝ කර ඇති බව නිවේදනයේ සඳහන් වේ. එමෙන්ම, සේවා ස්ථාන 393කින් සමන්විත වූ දුෂ්කර සේවා ස්ථාන ලැයිස්තුව විද්යාත්මක පදනමකින් තොරව 260 දක්වා අඩු කර ඇති අතර, මෙලෙස ලැයිස්තුවෙන් ඉවත් කළ රෝහල් වසා දැමීමේ තර්ජනයකට ලක්ව ඇති බව ද GMOA පවසයි. මෙම තීරණ හුදු දේශපාලන වුවමනාවන් මත ගනු ලැබූ ඒවා බවත්, පශ්චාත් සීමාවාසික වෛද්යවරුන් පවා දේශපාලනඥයන්ගේ වුවමනා එපාකම් මත අනුයුක්ත කිරීමට උත්සාහ කරන බවත් ඔවුහු චෝදනා කරති.
වර්තමාන සෞඛ්ය අමාත්යවරයාට මෙම ස්ථානමාරු ක්රියාවලිය සම්බන්ධයෙන් උපදෙස් ලබා දෙන්නේ පසුගිය රජයන්හි දේශපාලනඥයන් සමඟ සමීපව කටයුතු කළ පුද්ගලයෙකු බවත්, රාජ්ය සේවා කොමිෂන් සභාවේ බලතල කැබිනට් මණ්ඩලය වෙත ලබා ගැනීමට දරන මෙම උත්සාහය දැඩි පිළිකුලෙන් හෙළා දකින බවත් වෛද්ය නිලධාරීන්ගේ සංගමය පවසයි. මෙම අනීතික මැදිහත්වීම් වහාම නතර කර ස්ථානමාරු ක්රියාවලිය විනිවිදභාවයකින් යුතුව සිදු නොකරන්නේ නම්, ඉදිරි දිනවලදී දැඩි වෘත්තීය ක්රියාමාර්ගවලට එළඹීමට සිදුවන බව රජයේ වෛද්ය නිලධාරීන්ගේ සංගමය රජයට අවධාරණය කරයි.
