ඉන්ධන මිල ඉහළ යාමත් සමඟ රජයේ මැති ඇමතිවරුන්ට හිමිවන මසකට ලීටර් 800ක ඉන්ධන කෝටාව හේතුවෙන් ඔවුන්ගේ වැටුප වක්රව රුපියල් 80,000ක මුදලකින් ඉහළ ගොස් ඇති බව රජයේ වෛද්ය නිලධාරීන්ගේ සංගමය (GMOA) චෝදනා කරයි. ඉන්ධන ලීටරයක මිල රුපියල් 100කින් වැඩි වීම නිසා ඇමතිවරුන්ට මෙම වාසිය නිතැතින්ම හිමිවන බව පෙන්වා දෙන එම සංගමයේ මාධ්ය ප්රකාශක වෛද්ය චමිල් විජේසිංහ මහතා, සාමාන්ය ජනතාවට ඉන්ධන පිරිමසන ලෙස පවසන පාලකයින් තවමත් ඉන්ධන කාර්යක්ෂමතාව අඩු ‘V8’ වර්ගයේ සුඛෝපභෝගී රථ භාවිත කිරීම සදාචාරාත්මක නොවන බව අවධාරණය කළේය. මැති ඇමතිවරුන්ට අවශ්ය නම් පොදු ප්රවාහනය හෝ කුඩා රථ භාවිත කර ආදර්ශයක් විය හැකි බව ද ඔහු වැඩිදුරටත් සඳහන් කළේය.
මේ අතර වෛද්යවරුන් මුහුණ දෙන දැඩි අර්බුදය පැහැදිලි කරමින් ඔහු කියා සිටියේ, කොළඹ සිට මහියංගනය වැනි දුර බැහැර ප්රදේශවල සේවය කරන විශේෂඥ වෛද්යවරුන්ට තම රාජකාරිය සඳහා සතියකට අවම වශයෙන් ඉන්ධන ලීටර් 40ක් අවශ්ය වුවද දැනට ලැබෙනුයේ ලීටර් 25ක සතිපතා කෝටාවක් පමණක් බවයි. මේ හේතුවෙන් වෛද්යවරුන්ට මසකට රුපියල් 35,000කට අධික මුදලක් තම පෞද්ගලික වැටුපෙන් වැය කිරීමට සිදුව ඇති අතර, හදිසි ප්රතිකාර සහ රාත්රී සේවාවන් සඳහා පොදු ප්රවාහනය භාවිත කිරීම ප්රායෝගික නොවන බව ද ඔහු පෙන්වා දුන්නේය. රජයේ මෙම අත්තනෝමතික ක්රියාකලාපය හේතුවෙන් වෛද්යවරුන් සේවය හැරයාම තවදුරටත් ඉහළ යා හැකි බවත්, එමඟින් සමස්ත සෞඛ්ය පද්ධතියම අඩපණ වීමේ අවදානමක් පවතින බවත් වෛද්ය නිලධාරීන්ගේ සංගමය රජයට අනතුරු ඇඟවීය.
