අසාධාරණ ස්ථාන මාරුවීම්වලට එරෙහිව හෙට (අප්රේල් 04) උදෑසන 8.00 සිට නැවතත් වැඩවර්ජනයක් ආරම්භ කරන බව රජයේ වෛද්ය නිලධාරීන්ගේ සංගමය (GMOA) නිවේදනය කර තිබෙනවා. සිය ඉල්ලීම් සම්බන්ධයෙන් සාකච්ඡා කිරීමට සෞඛ්ය අමාත්ය නලින්ද ජයතිස්ස මහතා අපොහොසත් වන්නේ නම්, ඕනෑම දේශීය මාධ්ය නාලිකාවක විවෘත විවාදයකට පැමිණෙන ලෙසයි එම සංගමය අමාත්යවරයාට අභියෝග කර සිටින්නේ. සෞඛ්ය අමාත්යවරයා විසින් සීමාවාසික පුහුණුව අවසන් කළ වෛද්යවරුන්ට හෙට මධ්යහ්න 12.00 ට පෙර රාජ්ය සේවා පත්වීම් සඳහා අයදුම් කරන ලෙස නියෝග කර තිබුණද, ඊට පෙර කිසිදු වෛද්යවරයෙකු අයදුම් නොකරන බව රජයේ වෛද්ය නිලධාරීන්ගේ සංගමයේ ලේකම් වෛද්ය ප්රභාත් සුගතදාස මහතා ප්රකාශ කළා. වෛද්යවරුන් විවිධ පාර්ශ්වයන්ගෙන් තර්ජනවලට ලක්වන බවත්, එලෙස තර්ජනය කරන්නේ නම් පැමිණිලි කරන ලෙස අමාත්යවරයා පැවසුවද, පළමු පැමිණිල්ල සිදු කළ යුත්තේ වෛද්යවරුන්ට තර්ජනය කළ සෞඛ්ය අමාත්යවරයාට එරෙහිව බවයි ඔහු පෙන්වා දෙන්නේ.
ග්රාමීය රෝහල්වල පවතින දැඩි ගැටලු පෙන්වා දෙමින්, දූෂිත සහ වැරදි සහගත ක්රමවේදයකට සිදු කෙරෙන මෙම රාජ්ය සේවා පත්වීම් සඳහා අයදුම් නොකරන ලෙසයි වෛද්ය සංගමය සීමාවාසික පුහුණුව අවසන් කළ වෛද්යවරුන්ට උපදෙස් දී ඇත්තේ. සෞඛ්ය අමාත්යවරයා සාකච්ඡාවලට බියක් දක්වන බවත්, ගැටලු විසඳා ගැනීම සඳහා රජය සමඟ ඕනෑම මාධ්ය වේදිකාවක විවෘත විවාදයකට තමන් සූදානම් බවත් වෛද්ය සුගතදාස මහතා වැඩිදුරටත් කියා සිටියා. මෙම ප්රකාශය සිදු වූයේ සෞඛ්ය අමාත්යවරයා විසින් පනවා ඇති හෙට මධ්යහ්න 12.00 සීමාවට පෙර අයදුම් නොකරන වෛද්යවරුන් රාජ්ය සේවයට බඳවා නොගන්නා බවත්, ඔවුන්ගේ වත්මන් තනතුරු සහ වැටුප් අහිමි වන බවත් පැවසීමෙන් අනතුරුවයි. එලෙස කාලසීමාව මඟහරින අයදුම්කරුවන්ට ඉදිරි බඳවා ගැනීමකදී අවස්ථාව හිමි වන්නේ ලැයිස්තුවේ පතුලටම ගොස් ඊළඟට පැමිණෙන 1,300 ක පමණ කණ්ඩායමටත් පසුව බවයි අමාත්යවරයා අනතුරු අඟවා තිබුණේ.
