රන් මිල ශීඝ්රයෙන් ඉහළ යාමත් සමඟ රන් ආලේපිත පිත්තල ආභරණ රත්රන් ලෙස හඳුන්වා උකස් තබා මුදල් ලබාගැනීමේ මහා පරිමාණ ජාවාරමක් හැටන් ඇතුළු වතුකරය ආශ්රිතව ක්රියාත්මක වන බව වාර්තා වේ. මේ හේතුවෙන් ප්රදේශයේ රාජ්ය සහ පෞද්ගලික අංශයේ උකස් මධ්යස්ථාන රැසක් දැඩි මූල්යමය පාඩුවකට සහ ගැටලුකාරී තත්ත්වයකට මුහුණ දී සිටින බව ව්යාපාරිකයෝ පෙන්වා දෙති. වර්තමාන රන් මිල අනුව රන් පවුමක් රුපියල් ලක්ෂ දෙකේ සිට ලක්ෂ තුන දක්වා ඉහළ අගයකින් උකස් ගන්නා බැවින්, ජාවාරම්කරුවන් සූක්ෂ්ම ලෙස විවිධ වර්ගයේ පිත්තල ආභරණ මත ඝන රන් ආලේපනයක් යොදා මෙම වංචාව සිදුකරන බව අනාවරණය වී ඇත.
සාමාන්යයෙන් උකස් මධ්යස්ථාන මගින් ආභරණයක් භාරගැනීමේදී එහි බර, නිමාව සහ පවතින පළපුරුද්ද මත මෙන්ම විවිධ යන්ත්රානුසාරයෙන් උරගා බැලීමෙන් පසු රත්රන් බව තහවුරු කරගත්තද, මෙම ව්යාජ ආභරණවලට අධික ලෙස රන් ආලේප කර තිබීම නිසා ක්ෂණික පරීක්ෂාවකදී ඒවා හඳුනා ගැනීම අසීරු වී තිබේ. මෙම වංචාව හෙළිවන්නේ අදාළ ආභරණ උකස් තබා දීර්ඝ කාලයක් ගතවීමෙන් පසුව හෝ ඒවායේ රන් ආලේපිත ස්ථරය ගැලවී යාමට පටන් ගැනීමෙන් පසුවය. ජාවාරම්කරුවන් මෙම ආභරණ උකස් තැබීමෙන් පසු ඒවා නැවත බේරා ගැනීමට නොපැමිණෙන අතර, එම ආභරණ සන්තකයේ තබාගෙන සිටින ව්යාපාරිකයන්ට කාලයත් සමඟ එහි ඇතුළත පිත්තල බව හඳුනා ගැනීමට සිදුවන විට සිදුවිය යුතු මූල්යමය හානිය සිදුවී හමාරය.
මීට අමතරව මෙම වංචාවට හසුවූ වෙළෙඳුන් පවසන්නේ අදාළ ආභරණ උකස් තැබූ පුද්ගලයන් ලබාදී ඇති ලිපින සහ අනන්යතා තොරතුරු පවා ව්යාජ ඒවා බවට පසුව අනාවරණය වන බවයි. මෙලෙස ව්යාජ තොරතුරු ඉදිරිපත් කර රන් ආලේපිත පිත්තල ආභරණවලට උපරිම මුදලක් ලබාගෙන මාරු වී යන ජාවාරම්කරුවන් නිසා තමන්ට සිදුවන ලක්ෂ සංඛ්යාත පාඩුව විඳදරා ගැනීමට සිදුවී ඇති බව හැටන් ප්රදේශයේ උකස්කරුවෝ වැඩිදුරටත් කියා සිටිති. මේ සම්බන්ධයෙන් ප්රදේශයේ ආරක්ෂක අංශ දැනුවත් කිරීමටද ව්යාපාරිකයන් පියවර ගෙන ඇත.
