කෘතිම බුද්ධි (AI) දත්ත මධ්යස්ථානවලින් නිකුත් වන අධික තාපය පාලනය කිරීම සඳහා අවශ්ය දියර සිසිලන පද්ධති (Liquid Cooling Equipment) මිලදී ගැනීමට Google සමාගම චීනයේ Envicool ඇතුළු සමාගම් කිහිපයක් සමඟ සාකච්ඡා පවත්වමින් සිටින බව රොයිටර් පුවත් සේවය වාර්තා කරයි. AI තාක්ෂණය සඳහා යොදාගන්නා අධි-ඝනත්ව පරිගණක පද්ධති සාමාන්ය වායු සිසිලන පද්ධතිවලින් පාලනය කළ නොහැකි තරම් තාපයක් ජනනය කරන බැවින්, ජලය හෝ වෙනත් දියර වර්ග සංසරණය කරමින් ක්රියා කරන මෙම පද්ධති සඳහා ලොව පුරා විශාල ඉල්ලුමක් නිර්මාණය වී ඇත. AI සේවාදායක සඳහා වන මෙම දියර සිසිලන පද්ධතිවල ගෝලීය වෙළඳපොළ වටිනාකම පසුගිය වසරේ පැවති ඇමරිකානු ඩොලර් බිලියන 8.9 සිට 2026 වන විට ඩොලර් බිලියන 17ක් දක්වා වර්ධනය වනු ඇතැයි අපේක්ෂා කෙරේ. උපාංග සැපයුමේ පවතින දැඩි හිඟය හේතුවෙන් Google සමාගම සිය තායිවාන මෙහෙයුම් කණ්ඩායම් හරහා මෙම චීන සැපයුම්කරුවන් වෙත යොමු වී ඇති අතර, Envicool සමාගම දැනටමත් Google පිරිවිතරයන්ට අනුව සකස් කළ සිසිලන උපාංග ප්රදර්ශනය කර තිබීම ද විශේෂත්වයකි. ඇමරිකාව සහ චීනය අතර පවතින වෙළඳ පීඩනය නොතකා AI යටිතල පහසුකම් සංවර්ධනය කිරීමේදී චීන සැපයුම්කරුවන්ගේ දායකත්වය අත්යවශ්ය වී ඇති බව මෙම සාකච්ඡා මගින් තවදුරටත් පැහැදිලි වේ.
