තමන්ට එරෙහිව අන්තර්ජාලය හරහා පළ කර ඇති අපහාසාත්මක පුවත් සහ ලිපි ඉවත් කරන ලෙස නියෝගයක් නිකුත් කරන්නැයි ඉල්ලා ශ්රී ලංකා ශ්රේෂ්ඨාධිකරණයේ විනිසුරු ඒ.එච්.එම්.ඩී. නවාස් මහතා ඉන්දියාවේ කර්ණාටක මහාධිකරණය හමුවේ පෙත්සමක් ගොනු කර තිබේ. ගූගල් ඉන්දියා (Google India) සමාගමේ මූලස්ථානය බැංගලෝරයේ පිහිටා තිබීම පදනම් කර ගනිමින් විනිසුරුවරයා මෙම පියවර ගෙන ඇති අතර, අදාළ පුවත් මගින් තමන්ගේ ජාත්යන්තර කීර්තිනාමයට බරපතල හානි සිදුව ඇති බව ඔහු පෙන්වා දෙයි.
ශ්රී ලංකා ශ්රේෂ්ඨාධිකරණයේ සිව්වැනි ජ්යෙෂ්ඨතම විනිසුරුවරයා වන නවාස් මහතා පවසන්නේ, තමන් දැනට ශ්රේෂ්ඨාධිකරණයේ විනිසුරුවරයෙකු ලෙස කටයුතු කරන බැවින් ශ්රී ලංකාව තුළ මෙවැනි අපහාස නඩුවක් පැවරීම “තමාගේම නඩුවක තමාම විනිසුරුවරයා නොවිය යුතුය” යන නෛතික මූලධර්මයට පටහැනි වන බැවින් මෙම විදේශීය අධිකරණ බලය භාවිතා කළ බවයි. ‘Colombo Telegraph’ සහ ‘Lankaenews’ වැනි වෙබ් අඩවිවල 2015 සහ 2020 වසරවල පළ වූ පදනම් විරහිත කරුණු ගූගල් සෙවුම් යන්ත්රය හරහා තවමත් ප්රචාරය වන බව පෙත්සම මගින් පෙන්වා දී ඇත.
පෙත්සම සලකා බැලූ කර්ණාටක මහාධිකරණ විනිසුරු සචින් ශංකර් මගදුම් මහතා මේ සම්බන්ධයෙන් කරුණු දක්වන ලෙස ඉන්දීය රජයට සහ ගූගල් සමාගමට සිතාසි නිකුත් කළ අතර, මාර්තු 16 වැනිදාට පෙර ඊට ප්රතිචාර දක්වන ලෙස නියෝග කළේය. එසේම අදාළ වෙබ් අඩවි වෙත පෞද්ගලිකව දැනුම් දීම් සිදු කරන ලෙස ද අධිකරණය පෙත්සම්කාර විනිසුරුවරයාට දන්වා තිබේ.
