මෙරට ප්රධානතම සහල් වෙළෙඳ පොළ වන මරඳගහමුල සහල් ගබඩා සංකීර්ණය නිරීක්ෂණයට එක්වෙමින් වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහ මහතා ප්රකාශ කළේ, රජය සතු වී තොග සහල් බවට පත්කර වෙළෙඳපොළට මුදාහැරීම හරහා සහල් මිල සාර්ථකව පාලනය කර ඇති බවයි. 2013 වසරේ ඉදිකර මෙතෙක් භාවිතයට නොගත් රජයේ ගබඩා පද්ධතිය වත්මන් රජය යටතේ සක්රීය කර ඇති අතර, 2025 යල කන්නයේ මිලදී ගත් වී මෙට්රික් ටොන් 50,000ක් සහල් බවට පත්කර වෙළෙඳපොළට නිකුත් කිරීම මේ වන විට ආරම්භ කර තිබේ.
අමාත්යවරයා පෙන්වා දුන්නේ 2025 වසර මුලදී ඉතා ඉහළ මට්ටමක පැවති සහල් මිල මේ වන විට සැලකිය යුතු ලෙස අඩු වී ඇති බවයි. ඒ අනුව රතු/සුදු කැකුළු සහල් රුපියල් 200ට අඩුවෙන් ද, නාඩු සහල් රුපියල් 210-220 මට්ටමේ තබා ගැනීමටත් රජය සමත්ව ඇත. දිනකට සහල් මෙට්රික් ටොන් 300කට අධික ප්රමාණයක් ජාතික සතොස හරහා වෙළෙඳපොළට නිකුත් කෙරෙන අතර, ඉදිරි උත්සව සමයේදී සහල් මිල ඉහළ යාමට ඉඩ නොතබන බවට ද සහතිකයක් ලබා දෙන ලදී.
ජාතික සමූපකාර තොග වෙළෙඳ සංස්ථාවේ සභාපති කෝසල විල්බාව මහතා සඳහන් කළේ, සුළු හා මධ්ය පරිමාණ සහල් මෝල් හිමියන් සම්බන්ධ කරගනිමින් ක්රියාත්මක වන මෙම වැඩපිළිවෙළ මගින් ගොවියාට සහතික මිලක් හිමිවන අතරම පාරිභෝගිකයාට සහන මිලට සහල් ලබාගත හැකි බවයි. එළඹෙන මහ කන්නයේදී ද වී මෙට්රික් ටොන් ලක්ෂයකට අධික ප්රමාණයක් මිලදී ගැනීමට රජය සැලසුම් කර ඇති බැවින් සහල් හිඟයක් පිළිබඳ අනියත බියක් ඇති කර නොගත යුතු බව රජය අවධාරණය කරයි.
