රජයේ ප්රවෘත්ති දෙපාර්තමේන්තුව මඟින් මෙතෙක් අවිධිමත් ලෙස නිකුත් කරමින් පැවති “ජනමාධ්ය හැඳුනුම්පත” වඩාත් විධිමත් ක්රමවේදයකට අනුව නිකුත් කිරීමට පියවර ගෙන ඇති බව රජයේ ප්රවෘත්ති අධ්යක්ෂ ජනරාල් හර්ෂ බණ්ඩාර මහතා පවසයි. පසුගිය 18 වැනිදා ප්රවෘත්ති දෙපාර්තමේන්තුවේ පැවති වැඩමුළුවකට එක්වෙමින් ඔහු සඳහන් කළේ, මීට පෙර 8,100ක් පමණ වූ මාධ්ය හැඳුනුම්පත් සංඛ්යාව මෙම නව ක්රමවේදය හරහා 5,000 දක්වා අඩු කළ හැකි වනු ඇති බවයි.
මෙම වසරේ (2026) මාධ්ය හැඳුනුම්පත් නිකුත් කිරීමේදී ප්රාදේශීය මාධ්යවේදීන් 877ක් ඇතුළුව මාධ්යවේදීන් 4,700කට පමණ එය ලබා දීමට දැනටමත් පියවර ගනිමින් සිටී. ඇතැම් රාජ්ය ආයතනවල මාධ්ය අංශ සඳහා ද හැඳුනුම්පත් නිකුත් කිරීමට නියමිත බැවින් මුළු සංඛ්යාව 5,000ක් පමණ වනු ඇතැයි අපේක්ෂා කෙරේ. මෙම ක්රියාවලියේදී සුදුසුකම් සහිත කිසිදු මාධ්යවේදියෙකුගේ නමක් කපා හැරීමක් සිදු නොවන බව ද අධ්යක්ෂ ජනරාල්වරයා අවධාරණය කළේය.
රාජ්ය සහ පෞද්ගලික අංශයේ වෙනසකින් තොරව, අයවැයෙන් වෙන් කරන ලද ශිෂ්යත්ව මාධ්යවේදීන් වෙත ලබා දීමට කටයුතු කෙරේ. එසේම මීට පෙර ප්රවෘත්ති දෙපාර්තමේන්තුවේ නිලධාරීන්ට පමණක් සීමා වී තිබූ විදෙස් සංචාර, ඉදිරියේදී විධිමත් පදනමක් මත මාධ්යවේදීන් අතර බෙදා දීමට පියවර ගැනේ. ප්රවෘත්ති දෙපාර්තමේන්තුවෙන් සේවය ආරම්භ කර, ප්රාදේශීය ලේකම්වරයෙකු ලෙස කටයුතු කර නැවත දෙපාර්තමේන්තුවට පැමිණි තමා, පරිපාලන නිලධාරියෙකු ලෙස මෙම ආයතනය වඩාත් විධිමත් කරන බව හර්ෂ බණ්ඩාර මහතා වැඩිදුරටත් ප්රකාශ කළේය.
