මැදපෙරදිග කලාපයේ තෙල් ප්රවාහන මාර්ග සහ ආර්ථිකය දැඩි තර්ජනයකට ලක්ව ඇති පසුබිමක, ඉරානයේ යුදමය හැකියාවන් මුළුමනින්ම අඩපණ කරන තෙක් සිය මෙහෙයුම් නතර නොකරන ලෙස ගල්ෆ් කලාපීය අරාබි රටවල් අමෙරිකානු ජනාධිපති ඩොනල්ඩ් ට්රම්ප්ගෙන් ඉල්ලා සිටින බව රොයිටර් පුවත් සේවය වාර්තා කරයි. මෙම රටවල් මුලදී අමෙරිකාව සහ ඉරානය අතර යුද්ධයකට විරුද්ධ වුවද, ඉරානය විසින් ගල්ෆ් කලාපයේ ගුවන් තොටුපළවල්, වරායන් සහ තෙල් පිරිපහදු මධ්යස්ථාන වෙත මිසයිල සහ ඩ්රෝන ප්රහාර එල්ල කිරීමත් සමඟ ඔවුන්ගේ ස්ථාවරය වෙනස් වී තිබේ.
ලෝක තෙල් අවශ්යතාවයෙන් පහෙන් එකක් ප්රවාහනය කරන හෝමූස් සමුද්ර සන්ධියේ පාලනය ඉරානය විසින් නතු කර ගැනීම සහ නෞකා ගමනාගමනයට බාධා කිරීම සමස්ත කලාපයේම ස්ථාවරත්වයට එල්ල වූ මරු පහරක් බව ගල්ෆ් රටවල් පෙන්වා දෙයි. ඉරානය සතු ආක්රමණශීලී අවි ආයුධ සහ ඒවා නිෂ්පාදනය කිරීමේ හැකියාව සම්පූර්ණයෙන්ම විනාශ නොකළහොත්, ඉදිරියේදී ද මෙවැනි අර්බුද ඇති කරමින් ඉරානය කලාපීය බලශක්ති සැපයුම ප්රාණ ඇපයට ගනු ඇතැයි ඔවුන් බිය පළ කරති. “අමෙරිකාව සිය මෙහෙයුම් අතරමග නතර කළහොත්, අපට තනිවම ඉරානයට මුහුණ දීමට සිදුවනු ඇතැයි” සෞදි අරාබියේ ගල්ෆ් පර්යේෂණ මධ්යස්ථානයේ සභාපති අබ්දුලාසීස් සාගර් මහතා අවධාරණය කළේය.
කෙසේ වෙතත්, මෙම යුද්ධයට සෘජුවම සම්බන්ධ වීම සම්බන්ධයෙන් ගල්ෆ් රටවල් අතර තවමත් පවතින්නේ දෙගිඩියාවකි. සෞදි අරාබිය, එක්සත් අරාබි එමීර් රාජ්යය, කටාර් සහ ඕමානය වැනි රටවල් ඉරානයේ ප්රතිප්රහාරයන්ට සෘජුවම ලක්වීමේ අවදානමක් පවතින බැවින් ඔවුන් දැඩි සංයමයකින් කටයුතු කරයි. මේ අතර, හෝමූස් සමුද්ර සන්ධිය යළි විවෘත කිරීම සඳහා ජාත්යන්තර සන්ධානයක් ගොඩනැගීමට ජනාධිපති ට්රම්ප් උත්සාහ කරමින් සිටින අතර, ගල්ෆ් කලාපයෙන් ලැබෙන තෙල් මත බෙහෙවින් යැපෙන චීනය වැනි ආසියානු රටවල් ද මෙයට මැදිහත් විය යුතු බව විශ්ලේෂකයෝ පෙන්වා දෙති.
