ගල්ෆ් කලාපයේ මුහුදු සීමාව තුළ සිදුවන නෞකා ප්රහාර මාලාව තවදුරටත් උත්සන්න වී ඇති බව BBC පුවත් සේවය වාර්තා කරයි. පවතින උණුසුම් යුදමය වාතාවරණය හමුවේ වාණිජ නෞකා ඉලක්ක කර ගනිමින් මෙම ප්රහාර එල්ල වන අතර, ඉරාකයේ බස්රා නගරයේ උම් කස්ර් වරාය ආසන්නයේදී සිදු වූ ප්රහාරයකින් එක් අයෙකු මියගොස් ඇති බව ඉරාක බලධාරීහු තහවුරු කරති. එහිදී තවත් පුද්ගලයින් 38 දෙනෙකු නිරුපද්රිතව බේරා ගැනීමට ආරක්ෂක අංශ සමත් වී තිබේ.
මේ අතර, ඕමාන මුහුදු සීමාවේදී තායිලන්ත ධජය සහිත නෞකාවකට එල්ල වූ ප්රහාරයකින් පසු එහි සිටි නැවියන් 20 දෙනෙකු බේරා ගැනීමට ඕමාන බලධාරීන් කටයුතු කර ඇත. එම නැවියන්ගෙන් පිරිසක් තුවාල ලබා ඇති බව ඕමාන් ප්රවෘත්ති ඒජන්සිය උපුටා දක්වමින් විදෙස් මාධ්ය වාර්තා කරයි. කලාපීය නාවික ගමනාගමනයට මෙම ප්රහාර මගින් එල්ල වී ඇත්තේ දැඩි බලපෑමකි. ලෝක තෙල් මිල ඉහළ යාමට ද මෙම තත්ත්වය සෘජුවම බලපා ඇති අතර, ගල්ෆ් කලාපයේ ආරක්ෂාව සම්බන්ධයෙන් ජාත්යන්තර ප්රජාව සිය දැඩි අවධානය යොමු කර තිබේ.
