ඉන්දියාවේ ගුරුග්රම් (Gurugram) ප්රදේශයේ තනිව ගමන් කරමින් සිටි 54 හැවිරිදි කාන්තාවකගේ රන් ආභරණ සහ වටිනා දෑ කොල්ලකා ඇයව මහමගට තල්ලු කර දැමූ ත්රිරෝද රථ රියදුරෙකු ඊයේ (31) අත්අඩංගුවට ගත් බව පොලිසිය පවසයි. පෞද්ගලික ආයතනයක සේවය කරන මෙම කාන්තාව හිමාචල් ප්රදේශ් ප්රාන්තයේ පදිංචිකාරිනියකි.
ඊයේ අලුයම 2:30ට පමණ ‘ඉෆ්කෝ චෞක්’ (IFFCO Chowk) ප්රදේශයේ සිට තම නිවස බලා යාමට ඇය මෙම ත්රිරෝද රථයට ගොඩවී ඇති අතර, අතරමග පාළු ප්රදේශයකදී රියදුරා ඇයගේ කට වසා රන් ආභරණ, අත්ඔරලෝසුව සහ අනෙකුත් බඩු බාහිරාදිය උදුරාගෙන තිබේ. පසුව ඇයව ත්රිරෝද රථයෙන් පිටතට තල්ලු කර ඔහු පළා ගොස් ඇති බව වාර්තා වේ.
සිද්ධිය සම්බන්ධයෙන් ගුරුග්රම්හි සෙක්ටර් 18 පොලිස් ස්ථානයට පැමිණිලි කිරීමෙන් පසු පැය කිහිපයක් ඇතුළත රියදුරා අත්අඩංගුවට ගැනීමට පොලිසිය සමත් විය. කොල්ලකන ලද භාණ්ඩ සියල්ල සොයාගෙන ඇති අතර අපරාධය සඳහා යොදාගත් ත්රිරෝද රථය ද පොලිස් භාරයට ගෙන තිබේ. ආරක්ෂක අංශ පවසන්නේ රාත්රී කාලයේ ගමන් ගන්නා මගීන්ගේ ආරක්ෂාව වෙනුවෙන් මෙහෙයුම් තවදුරටත් දැඩි කර ඇති බවයි.
