හයිටි රාජ්යයේ හිටපු අග්රාමාත්ය ගැරී කොනිල් (Garry Conille) මහතා කෙන්යාවේ එක්සත් ජාතීන්ගේ නේවාසික සම්බන්ධීකාරක (U.N. Resident Coordinator) ලෙස පත් කළ බව එක්සත් ජාතීන්ගේ සංවිධානය ඊයේ (01) නිවේදනය කළේය. ඒ අනුව ඔහු එදිනම සිය නව තනතුරේ වැඩකටයුතු ආරම්භ කිරීමට නියමිතව තිබිණි.
ගැරී කොනිල් මහතා 2024 වසරේදී මාස හයක කාලයක් හයිටි අග්රාමාත්යවරයා ලෙස කටයුතු කළ අතර, එම කාලය තුළ හයිටියේ සන්නද්ධ කල්ලි මර්දනය කිරීම සඳහා කෙන්යානු හමුදා මෙහෙයවන ලද එක්සත් ජාතීන්ගේ අනුමත ආරක්ෂක බලකාය ස්ථාපිත කිරීමේ මූලික පියවර ගන්නා ලදී. දැනට හයිටියේ ක්රියාත්මක වන මෙම ‘කල්ලි මර්දන බලකාය’ (Gang Suppression Force) සඳහා කෙන්යාව ප්රධානත්වය දෙනු ලබන අතර, ඉදිරියේදී අනෙකුත් රටවල හමුදා පැමිණීමත් සමඟ කෙන්යානු හමුදා ක්රමයෙන් ඉවත් වනු ඇතැයි වාර්තා වේ.
දැනට හයිටියේ ස්ථාපිත කර ඇති හමුදා සංඛ්යාව 1,000කට වඩා අඩු මට්ටමක පවතින අතර, ලබන ගිම්හාන සෘතුව වන විට එය 5,500ක් දක්වා ඉහළ නැංවීමට එක්සත් ජාතීන්ගේ සංවිධානය අපේක්ෂා කරයි. කෙසේ වෙතත්, හයිටි අගනුවර වන පෝට්-ඕ-ප්රින්ස් (Port-au-Prince) හි වැඩි බලයක් සන්නද්ධ කල්ලි සතුව පවතින බැවින් ආරක්ෂාව තහවුරු කිරීම තවදුරටත් අභියෝගාත්මක වී තිබේ. ගැරී කොනිල් මහතාගෙන් පසු අලික්ස් ඩිඩියර් ෆිල්ස්-අයිමේ (Alix Didier Fils-Aime) පසුගිය පෙබරවාරි මාසයේදී හයිටියේ පූර්ණ විධායක බලය සහිත නායකයා ලෙස පත් විය.
