හම්බෙගමුව පොලිසිය සහ ශ්රී ලංකා යුද හමුදා ඩ්රෝන ඒකකය ඒකාබද්ධව සිදුකළ විශේෂ මෙහෙයුමකදී උඩවලව වන රක්ෂිතය තුළ ඉතා රහසිගතව පවත්වාගෙන ගිය මහා පරිමාණ ගංජා හේන් පහක් වටලා විනාශ කිරීමට පියවර ගෙන තිබේ. අද (03) දින සිදුකළ මෙම වැටලීමේදී අස්වනු නෙළීමට ආසන්න මට්ටමේ තිබූ ගංජා ගස් 50,000කට අධික ප්රමාණයක් සොයාගෙන ඇති අතර, ඒවා එම ස්ථානයේදීම ගිනි තබා විනාශ කර ඇති බව වාර්තා වේ. ඝන වනාන්තරය තුළ පිහිටි මෙම හේන් සොයා ගැනීම සඳහා නවීන ඩ්රෝන තාක්ෂණය භාවිත කිරීම මෙහි විශේෂත්වයකි.
පොලිස් වාර්තාවලට අනුව සොයාගත් හේන් අතර අක්කර දෙකක වපසරියකින් යුත්, අඩි හතරකට වඩා උසින් වැඩුණු ගංජා ගස් 20,120ක් අඩංගු විශාලතම හේන ද ඇතුළත් වේ. මීට අමතරව අඩි හයහමාරක් පමණ උසට වැඩුණු ගංජා ගස් 11,200ක් සහිත අක්කර එකයි කාලක හේනක් සහ තවත් අක්කර කිහිපයක පැතිරුණු ගංජා වගාවන් රැසක් පොලිස් භාරයට ගැනුණි. හම්බෙගමුව පොලිස් ස්ථානාධිපති තුෂාර සම්පත් මහතා ඇතුළු නිලධාරීන් කණ්ඩායමක් විසින් මෙම සාර්ථක වැටලීම මෙහෙයවන ලදී.
වන රක්ෂිත මධ්යයේ සිදුකරන මෙවැනි නීති විරෝධී වගාවන් මැඩලීම සඳහා ඉදිරියටත් ඩ්රෝන තාක්ෂණය උපරිමයෙන් භාවිත කරන බව ආරක්ෂක අංශ පවසයි. මෙම වැටලීම සිදුකරන අවස්ථාවේදී සැකකරුවන් ප්රදේශයෙන් පලා ගොස් ඇති අතර ඔවුන් අත්අඩංගුවට ගැනීම සඳහා හම්බෙගමුව පොලිසිය වැඩිදුර විමර්ශන පවත්වයි. වන රක්ෂිත විනාශ කරමින් සිදුකරන මෙවැනි ජාවාරම් හේතුවෙන් පරිසර පද්ධතියට සිදුවන හානිය පිළිබඳව ද බලධාරීන් සිය අවධානය යොමු කර ඇත.
