ඉරාන-ඇමෙරිකානු යුද්ධය ආරම්භ වූ දා සිට ඇමෙරිකානු සමාගමකට එල්ල වූ එකම ප්රබල සයිබර් ප්රහාරයේ වගකීම භාරගත් ඉරානයට සම්බන්ධ ‘හන්ඩාලා’ (Handala) නැමැති හැකර් කණ්ඩායමේ වෙබ් අඩවිය අත්පත් කර ගැනීමට ඇමෙරිකානු ෆෙඩරල් විමර්ශන කාර්යාංශය (FBI) සමත් වී තිබේ. පසුගිය අඟහරුවාදා සිට එම වෙබ් අඩවිය වෙත පිවිසෙන විට දිස්වන්නේ එය එෆ්.බී.අයි (FBI) සහ අධිකරණ දෙපාර්තමේන්තුවේ භාරයට ගෙන ඇති බව පවසන නිල නිවේදනයකි. විදේශ රාජ්යයක මෙහෙයවීම මත සිදුකෙරෙන හානිකර සයිබර් ක්රියාවලීන් සඳහා මෙම වෙබ් අඩවිය භාවිතා කර ඇති බව එම නිවේදනයේ වැඩිදුරටත් සඳහන් වේ.
මිචිගන් ප්රාන්තය පදනම් කරගත්, ලොව ප්රමුඛ පෙළේ වෛද්ය තාක්ෂණ සමාගමක් වන ‘ස්ට්රයිකර්’ හි පද්ධතිවලට ඇතුළු වූ හැකර්වරුන්, එහි නිෂ්පාදන කටයුතු, ඇණවුම් සැකසීම සහ බෙදා හැරීමේ ජාලයන්ට බාධා පමුණුවා තිබුණි. ඔවුන් මයික්රොසොෆ්ට් ඉන්ටියුන් (Microsoft Intune) නැමැති මෘදුකාංගය හරහා සමාගමේ ජංගම දුරකථන සහ ලැප්ටොප් පරිගණකවල දත්ත සමූහ වශයෙන් මකා දමා (Wiping) ඇති බව වාර්තා වේ. මෙය තාක්ෂණිකව ඉතා සංකීර්ණ ප්රහාරයක් නොවුණද, ඉන් සිදු වූ හානිය සැලකිය යුතු මට්ටමක පවතින බව සමාගම කොටස් වෙළඳපොළ බලධාරීන්ට දැනුම් දී තිබේ.
‘හන්ඩාලා’ කණ්ඩායමේ එක්ස් (X) ගිණුම ද අත්හිටුවා ඇති අතර, ඔවුන්ගේ ටෙලිග්රෑම් (Telegram) චැනලය හරහා ප්රකාශ කර ඇත්තේ තමන්ගේ වෙබ් අඩවිය අත්පත් කර ගැනීම යුක්තියේ හඬ නිහඬ කිරීමට ගත් උත්සාහයක් බවයි. කෙසේ වෙතත්, ඔවුන් ඉක්මනින්ම නව වෙබ් අඩවියක් ආරම්භ කරන බවට ද තර්ජනය කර තිබේ. සයිබර් ආරක්ෂණ විශේෂඥයන් පෙන්වා දෙන්නේ ඉරාන බුද්ධි අංශ විසින් මෙහෙයවන මෙම කණ්ඩායමේ ප්රධාන අරමුණ වී ඇත්තේ සැබෑ හානියට වඩා මානසික බියක් ඇති කිරීම (Psychological effect) බවයි.
ඇමෙරිකානු සයිබර් ආරක්ෂණ සහ යටිතල පහසුකම් ආරක්ෂණ ඒජන්සිය (CISA) ප්රකාශ කරන්නේ යුද්ධය ආරම්භ වූ දා සිට සයිබර් ප්රහාරවල විශාල වර්ධනයක් දක්නට නොලැබෙන බවයි. එසේ වුවද, ආයතන සතු මයික්රොසොෆ්ට් ගිණුම්වල ආරක්ෂාව තර කරන ලෙස ඔවුන් සියලු සමාගම්වලට උපදෙස් දී තිබේ. ඉරානයට එරෙහිව ඇමෙරිකානු සහ ඊශ්රායල හමුදා එල්ල කරන ප්රහාර හමුවේ ඉරාන හැකර්වරුන්ගේ ක්රියාකාරීත්වය මේ වන විට තරමක් අඩුවී ඇති බවක් නිරීක්ෂණය වේ.
