හිටපු ජනාධිපති රනිල් වික්රමසිංහ මහතා සිරගත කිරීමට වත්මන් රජය ගෙන යන බව කියන අසාධාරණ උත්සාහයට එරෙහිව ජාත්යන්තර ප්රජාව දැනුවත් කිරීමට පියවර ගන්නා බව හිටපු අමාත්ය හරින් ප්රනාන්දු මහතා පවසයි. අද (23) පැවැති මාධ්ය හමුවකට එක්වෙමින් ඔහු අවධාරණය කළේ, රජයේ මෙම ක්රියාකලාපය පිළිබඳව ජනතාව දැනුවත් කිරීම සඳහා දීපව්යාප්ත වැඩපිළිවෙළක් ද දියත් කරන බවයි.
හිටපු ජනාධිපතිවරයාගේ ලන්ඩන් සංචාරයට අදාළ විමර්ශන මාසයක් ඇතුළත අවසන් කර ලබන මාර්තු මාසයේදී නීතිමය පියවර ගන්නා බව නීතිපතිවරයා විසින් කොළඹ කොටුව මහේස්ත්රාත් අධිකරණයට දැනුම් දීමත් සමඟ මෙම දේශපාලන උණුසුම නිර්මාණය වී තිබේ. මෙය දේශපාලන පළිගැනීමක් බවට චෝදනා කරන හරින් ප්රනාන්දු මහතා, රජය මේ වන විට පාලනය කරගත නොහැකි ගැටලුවලට මැදිවී සිටින බැවින් මෙවැනි ක්රියා මාර්ග හරහා ජනතා අවධානය වෙනතකට යොමු කිරීමට උත්සාහ කරන බව ද පවසා සිටියේය.
මෙම සිදුවීම හුදෙක් දේශීය කාරණයක් ලෙස අත් නොහරින බවත්, හිටපු රාජ්ය නායකයෙකුට එරෙහිව දියත් වන මෙවැනි ක්රියාදාමයන් පිළිබඳව ලෝක අවධානය යොමු කරවන බවත් ඔහු වැඩිදුරටත් කියා සිටියේය. මාර්තු මාසයේදී නඩු පැවරීමට නියමිත බව පවසන පසුබිමක, විපක්ෂය නියෝජනය කරන දේශපාලන කණ්ඩායම් මේ සම්බන්ධයෙන් සිය දැඩි විරෝධය පළ කරමින් සිටියි.
