බාලදක්ෂ ව්යාපාරය යනු හුදෙක් තනතුරු දැරීමක් නොව, “සූදානම්ව සිටිමින්” අන් අයට සේවය කිරීම සඳහා ලැබෙන උතුම් ප්රායෝගික පුහුණුවක් බව අග්රාමාත්ය ආචාර්ය හරිනි අමරසූරිය මහත්මිය අවධාරණය කරයි. ලෝක බාලදක්ෂ ව්යාපාරයේ නිර්මාතෘ බේඩන් පවල් සාමිවරයාගේ 169 වැනි ජන්ම දින සැමරුම සහ ලෝක බාලදක්ෂ ‘සිතීමේ දිනය’ (Thinking Day) වෙනුවෙන් කොළඹ ජාතික බාලදක්ෂ මූලස්ථානයේදී ඊයේ (22) පැවැති උත්සවය අමතමින් ඇය මේ බව කියා සිටියාය.
නවීන තාක්ෂණය භාවිත කරන අතරම, අන්යයන්ට ගරු කරන විනයගරුක ‘ස්මාර්ට්’ බාලදක්ෂයකු ලෙස සමාජයට සේවය කිරීමේ වැදගත්කම අග්රාමාත්යවරිය මෙහිදී පෙන්වා දුන්නාය. එසේම ගස් වැවීම සහ ජල මූලාශ්ර රැකගැනීම වැනි පරිසර හිතකාමී වැඩසටහන් හරහා රටේ අනාගතය සුරක්ෂිත කිරීමට දායක වන ලෙස ද ඇය බාලදක්ෂ දරුවන්ගෙන් ඉල්ලා සිටියාය.
මෙහිදී අදහස් දැක්වූ ප්රධාන බාලදක්ෂ කොමසාරිස් නීතිඥ මනෝජ් නානායක්කාර මහතා සඳහන් කළේ, පෙර පාසල් දරුවන් වෙනුවෙන් “සුපිපි” නමින් නව අංශයක් සහ ශ්රී ලංකා පොලිසිය හා සම්බන්ධව “පොලිස් බාලදක්ෂ” අංශයක් ආරම්භ කිරීමට සැලසුම් කර ඇති බවයි. නව අධ්යාපන ප්රතිසංස්කරණ සඳහා බාලදක්ෂ ව්යාපාරයේ පවතින ප්රායෝගික පුහුණු අත්දැකීම් උපයෝගී කරගනිමින් පූර්ණ සහාය ලබාදෙන බවත්, ඒ සඳහා අධ්යාපන අමාත්යාංශයේ සහාය අපේක්ෂා කරන බවත් ඔහු වැඩිදුරටත් පැවසීය.
මෙම උත්සවයේදී බාලදක්ෂ ඩිජිටල්කරණ ව්යාපෘතිය යටතේ දිස්ත්රික්ක කිහිපයකට ලැප්ටොප් පරිගණක සහ ප්රථමාධාර කට්ටල ප්රදානය කිරීම ද සිදු විය. අග්රාමාත්ය ලේකම් ප්රදීප් සපුතන්ත්රි මහතා ඇතුළු බාලදක්ෂ සංගමයේ නිලධාරීන් රැසක් මෙම අවස්ථාවට එක්ව සිටියහ.
