රජය පවසන පරිදි ශක්තිමත් ජාත්යන්තර සබඳතා පවත්වන්නේ නම්, ශ්රී ලංකාවේ අපනයන භාණ්ඩ සඳහා මෙතෙක් තීරුබදු සහන ලබා ගැනීමට අපොහොසත් වී ඇත්තේ මන්දැයි සමගි ජන බලවේගයේ පාර්ලිමේන්තු මන්ත්රී හර්ෂ ද සිල්වා මහතා ප්රශ්න කරයි. සම්මුඛ සාකච්ඡාවකට එක්වෙමින් ඔහු පෙන්වා දුන්නේ අසල්වැසි රටවල් ජාත්යන්තර වෙළඳ පොළ ජයගනිද්දී ශ්රී ලංකාව එම අවස්ථාවන් මගහැර ගනිමින් සිටින බවයි.
විශේෂයෙන්ම ඉන්දියාව ඇමරිකා එක්සත් ජනපදය සමඟ වෙළඳ ගිවිසුමකට මූලික අඩිතාලම දමා සිය අපනයන තීරුබදු අඩු කර ගැනීමට සමත්ව ඇති බව ඔහු සඳහන් කළේය. එමෙන්ම ඉන්දියාව යුරෝපා සංගමය සමඟ ද එවැනිම ගිවිසුමකට එළඹීම හරහා යුරෝපා රටවල් 20කට සිය නිෂ්පාදන තීරුබදු රහිතව අපනයනය කිරීමේ අවස්ථාව උදාකර ගෙන තිබේ. බංග්ලාදේශය ද ඇමරිකාව සමඟ මෙවැනි සහනදායී වෙළඳ අවස්ථාවන් දිනාගෙන ඇති පසුබිමක, ශ්රී ලංකාවට තවමත් එවැනි අවස්ථාවක් දිනා ගැනීමට නොහැකි වීම පිළිබඳව ඔහු රජයෙන් විමසා සිටියි.
