දික්ඔය මූලික රෝහලේ මෘත ශරීරාගාරයේ තිබූ තරුණියකගේ මළ සිරුරක් රෝහල් සේවකයන් තිදෙනෙකු විසින් දූෂණය කළ බවට එල්ල වන චෝදනා මුල් කරගනිමින් හැටන් ඇබෝස්ලි වතුයායේ කම්කරුවන් විශාල පිරිසක් අද (05) රෝහල වටලා විරෝධතාවක නිරත විය. සැකකාර සේවකයන් වහාම අත්අඩංගුවට ගන්නා ලෙස බල කරමින් පැවැති මෙම විරෝධතාව හේතුවෙන් පොලිසිය සහ වතු කම්කරුවන් අතර දැඩි උණුසුම් තත්ත්වයක් ඇති වූ අතර, විරෝධතාව නිසා රෝහලේ කටයුතුවලට බාධා එල්ල වන බව පවසමින් වෛද්යවරුන් ඇතුළු කාර්ය මණ්ඩලය ද වැඩ වර්ජනයක් ආරම්භ කර තිබේ. රෝහල් අධ්යක්ෂ වෛද්ය එම්.එස්. ෆසීල් මහතා මීට පෙර ප්රකාශ කර තිබුණේ ආරක්ෂිත කැමරා දර්ශන පරීක්ෂා කිරීමේදී පසුගිය 23 වැනිදා රාත්රියේ සේවකයන් තිදෙනෙකු මෘත ශරීරාගාරයට ඇතුළු වන අයුරු පෙනෙන බවත්, එහි තිබූ මළ සිරුරක් වෙනස් වී තිබූ බවත්ය.
කෙසේ වෙතත්, අද දින විරෝධතාකරුවන් හමුවේ පොලිසිය කියා සිටියේ මියගිය තරුණියගේ දෙමාපියන් පැමිණිල්ලක් ඉදිරිපත් කරමින් එවැනි සිදුවීමක් සිදු වී නොමැති බවත් විමර්ශන අවශ්ය නොවන බවත් ප්රකාශ කර ඇති බවයි. නමුත් විරෝධතාකරුවන් චෝදනා කරන්නේ රෝහල් පාලනාධිකාරිය විසින් දෙමාපියන්ට බලපෑම් කර එම ප්රකාශය ලබාගෙන ඇති බවත්, මීට පෙරද මෙවැනි සිදුවීම් රෝහල තුළ සිදුව ඇති බවත්ය. සිද්ධිය සම්බන්ධයෙන් ඇසින් දුටු සාක්ෂි නොමැතිව අත්අඩංගුවට ගැනීම් කළ නොහැකි බව සහකාර පොලිස් අධිකාරී නිස්සංක ගොඩමුන්න මහතා පැවසුවද, සාධාරණයක් ඉටු නොවුණහොත් සමස්ත වතුකරයම එක්ව දැවැන්ත විරෝධතාවක් පවත්වන බව පවසමින් වතු කම්කරුවන් අද පස්වරුවේ විරෝධතාව තාවකාලිකව නතර කළහ.
