හිඟුරක්ගොඩ ප්රාදේශීය සභාව මඟින් ආරම්භ කිරීමට යෝජිත කසළ ප්රතිචක්රීකරණ මධ්යස්ථාන ගොඩනැඟිල්ලේ ඉදිකිරීම් කටයුතු නිරීක්ෂණය කිරීම සඳහා පැමිණි නිවාස සංවර්ධන, ඉදිකිරීම් සහ ජල සම්පාදන නියෝජ්ය අමාත්ය ටී. බී. සරත් මහතාට ප්රදේශවාසීන්ගෙන් දැඩි විරෝධයක් එල්ල වී තිබෙනවා. ජනතාව පාරට බැස විරෝධය පළ කිරීමත් සමඟ නියෝජ්ය අමාත්යවරයාට එම ස්ථානයෙන් පිටව යාමට සිදු වූ බවයි වාර්තා වන්නේ.
හිඟුරක්ගොඩ, දොරදෙක ප්රදේශයේ මෙම කසළ ප්රතිචක්රීකරණ මධ්යස්ථානය ඉදිකිරීමෙන් ප්රදේශය පුරා දැඩි පාරිසරික සහ සෞඛ්ය ගැටලු රැසක් මතු වන බව ප්රදේශවාසීහු පෙන්වා දෙනවා. මේ හේතුවෙන් දොරදෙක, කිඹුලාවල, ගම්පොළවත්ත, දොරහතර, මාරසිංහවත්ත සහ හිඟුරක්ගොඩ යන ප්රදේශවල විශාල ජනතාවක් එක්ව මෙම දැවැන්ත විරෝධතාවයේ නිරත වී තිබෙනවා.
හිඟුරක්ගොඩ සමුපකාර වී ගබඩාව අසල මෙම මධ්යස්ථානය ඉදිකිරීම සඳහා මේ වන විටත් ගඩොල් සහ වැලි ගෙනැවිත් දමා භූමිය සකස් කර තිබෙනවා. කෙසේ වෙතත් ජනතාව ඉල්ලා සිටින්නේ මෙමඟින් සිදු වන පාරිසරික හානිය සලකා බලා ජනාවාස මධ්යයේ ඉදි කිරීමට යන මෙම ව්යාපෘතිය වහාම නවතා දමන ලෙසයි.
