දිවයිනේ දැනට පවතින අධික උණුසුම් කාලගුණික තත්ත්වය හමුවේ දරුවන් විජලනයෙන් සහ තාප කම්පනයෙන් (Heat Stroke) ආරක්ෂා කර ගැනීම සඳහා දෙමාපියන් සහ ගුරුවරුන් විශේෂ අවධානයක් යොමු කළ යුතු බව සෞඛ්ය අංශ අවධාරණය කරයි. කොළඹ රිජ්වේ ආර්යා ළමා රෝහලේ විශේෂඥ වෛද්ය දීපාල් පෙරේරා මහතා පෙන්වා දෙන්නේ මේ දිනවල දරුවන්ට හැකිතාක් ජලය සහ ස්වාභාවික දියර ආහාර ලබා දීමට කටයුතු කළ යුතු බවයි. දරුවෙකු තුළ නිදිමත ගතිය, ආහාර අරුචිය හෝ ඇඟපත වේදනාව වැනි රෝග ලක්ෂණ පෙන්නුම් කරන්නේ නම් එය විජලනයේ ලක්ෂණ විය හැකි බැවින් වහාම වැඩිපුර දියර වර්ග ලබා දීමට පියවර ගත යුතුය.
මෙම උණුසුම් වාතාවරණය සමේ රෝගී තත්ත්වයන් ඉහළ යාමට ද හේතු විය හැකි බැවින් දරුවන් දිනකට අවම වශයෙන් දෙවතාවක්වත් ස්නානය කරවීම යෝග්ය බව වෛද්යවරයා සඳහන් කරයි. විශේෂයෙන්ම සමේ ඇතිවන දද සහ කුෂ්ඨ වැනි රෝගී තත්ත්වයන් පාලනය කර ගැනීම සඳහා දරුවන් විනාඩි 20ක් පමණ ජලයේ රඳවා තැබීම ආරක්ෂිත ක්රමවේදයක් ලෙස ඔහු හඳුන්වා දෙයි. පවතින තත්ත්වය හමුවේ පාසල් නිවාසාන්තර ක්රීඩා උත්සව සහ ධාවන තරගවලට සහභාගී වන දරුවන් පිළිබඳව දැඩි සුපරීක්ෂාකාරී විය යුතු අතර, අවශ්ය පමණට ජලය පානය නොකිරීමෙන් තාප කම්පනය වැනි මාරාන්තික තත්ත්වයන් පවා ඇති විය හැකි බවට අනතුරු අඟවා ඇත.
තාප කම්පනයකදී දරුවෙකුගේ මොළයට සහ හෘදයට සෘජුව බලපෑම් එල්ල විය හැකි අතර වලිප්පුව හෝ ක්ලාන්තය වැනි තත්ත්වයන් මතු විය හැකිය. එබැවින් එළිමහන් ක්රියාකාරකම්වලදී වැඩිපුර ජලය පානය කිරීම අනිවාර්ය කළ යුතු බවත්, දරුවන්ගේ සෞඛ්යය පිළිබඳව වැඩි අවධානයක් යොමු කිරීම අත්යවශ්ය බවත් විශේෂඥ වෛද්ය දීපාල් පෙරේරා මහතා වැඩිදුරටත් සඳහන් කළේය. මේ අතර ගෝලීය වශයෙන් ද බලශක්ති සහ ආර්ථික අර්බුද මතු වෙමින් පවතින පසුබිමක, මෙරට අභ්යන්තර ගැටලු මෙන්ම කාලගුණික විපර්යාසයන්ට ද මුහුණ දීමට ජනතාවට සිදුව තිබේ.
