දිල්ලියේ ද්වාර්කා ප්රදේශයේදී 23 හැවිරිදි සහිල් ධනේශ්වරාගේ මරණයට හේතු වූ මාරක SUV රථ අනතුර සම්බන්ධයෙන් අත්අඩංගුවේ පසුවන 17 හැවිරිදි සිසුවාගේ පියා ඊයේ (17) ප්රථම වරට මාධ්ය හමුවේ අදහස් දක්වමින් සිය කනගාටුව පළ කළේය. තම පවුල මෙන්ම වින්දිතයාගේ පවුල ද දැඩි ශෝකයකට පත්ව සිටින බව ඔහු මෙහිදී සඳහන් කළේය.
මියගිය සහිල්ගේ පශ්චාත් මරණ පරීක්ෂණ වාර්තාවට අනුව, වේගයෙන් පැමිණි ස්කෝපියෝ රථය ගැටීමෙන් ඔහුගේ හිස්කබල, ඉලඇට කිහිපයක් සහ වැලමිට බිඳී ගොස් ඇති අතර ඔහු එම ස්ථානයේදීම මියගොස් තිබේ. අනතුර සිදුවන අවස්ථාවේ රථය තුළ සැකකාර සිසුවා සහ ඔහුගේ සහෝදරිය සිට ඇති අතර, ඔහු තම සහෝදරියව ඇරලවීමට යන අතරතුර මෙම අනතුර සිදුව ඇති බව වාර්තා වේ.
පොලිස් ප්රශ්න කිරීම්වලින් අනතුරුව අදහස් දැක්වූ පියා පවසා සිටියේ, අනතුර සිදුවන අවස්ථාවේ තමා නගරයේ නොසිටි බවත් තම පුතා රිය පදවන බව තමා නොදැන සිටි බවත්ය. අදාළ SUV රථය තම ප්රවාහන ව්යාපාරයට අයත් එකක් බවත්, එහි මීට පෙර පවතින දඩ පත්රිකා (Challans) තම රියදුරන් අතින් සිදුවූ වැරදි බවත් ඔහු පැහැදිලි කළේය. තවද, තම දියණිය වීඩියෝවක් (Reel) සකසමින් සිටි බවට එල්ල වන චෝදනා ද ඔහු ප්රතික්ෂේප කළේය.
මෝටර් වාහන පනත යටතේ සැකකාර සිසුවාගේ පියාට එරෙහිව ද දිල්ලි පොලිසිය මේ වන විට නඩුවක් ගොනු කර තිබේ. තම පුතා මෙම සිදුවීමෙන් දැඩි මානසික කම්පනයකට පත්ව සිටින බවත්, නීතිමය ක්රියාවලියට උපරිම සහයෝගය ලබා දෙන බවත් ඔහු වැඩිදුරටත් පැවසීය.
