මැදපෙරදිග යුද්ධය හේතුවෙන් ගෝලීය තෙල් වෙළඳපොළ ඉතිහාසයේ දරුණුතම සැපයුම් බාධාවකට මුහුණ දී සිටින බව ජාත්යන්තර බලශක්ති ඒජන්සිය (IEA) අද (මාර්තු 20) නිවේදනය කළේය. හෝමුස් සමුද්ර සන්ධියේ පවතින ගැටුම්කාරී තත්ත්වය නිසා ලෝක තෙල් සැපයුමෙන් පහෙන් එකකට බාධා පැමිණ ඇති අතර, මෙහි බලපෑම අවම කර පාරිභෝගිකයන් සුරක්ෂිත කිරීම සඳහා IEA විසින් හදිසි පියවර 10ක් යෝජනා කර තිබේ. ජාත්යන්තර බලශක්ති ඒජන්සියේ විධායක අධ්යක්ෂ ෆාති බිරෝල් (Fatih Birol) පවසන්නේ මෙම පියවරයන් මඟින් තෙල් සඳහා පවතින ඉල්ලුම අඩු කර ආර්ථිකයට එල්ල වන කම්පනය අවම කර ගත හැකි බවයි. එමෙන්ම පොසිල ඉන්ධන මත පවතින අසීමිත යැපීම මෙවැනි භූ-දේශපාලනික අර්බුද හමුවේ රටවල් දැඩි අනතුරකට ලක් කරන බව ද ඔහු අවධාරණය කළේය.
මෙම ඉන්ධන පාලනය සහ සේවා මුර වෙනස් කිරීම යටතේ සතියකට දින කිහිපයක් නිවසේ සිට වැඩ කිරීමට (Work from home) සේවකයන් දිරිමත් කිරීම ප්රධාන වේ. පාකිස්ථානය දැනටමත් සති දෙකකට පාසල් වසා දමා ඇති අතර රජයේ ආයතන සඳහා දින 4ක වැඩ සතියක් හඳුන්වා දී ඇත. වියට්නාමය සහ පිලිපීනය ද මෙවැනි පියවර ගෙන ඇති අතර තායිලන්තය සිය රජයේ සේවකයන්ට සෝපාන වෙනුවට පඩිපෙළ භාවිතා කරන ලෙසත්, වායුසමීකරණ යන්ත්ර 27°C මට්ටමේ පවත්වා ගන්නා ලෙසත් උපදෙස් දී ඇත. මීට අමතරව මහාමාර්ගවල වේග සීමාව අවම වශයෙන් පැයට කිලෝමීටර් 10කින් අඩු කිරීම මඟින් ඉන්ධන ඉතිරි කර ගැනීමට යෝජනා කර ඇති අතර, පෞද්ගලික වාහන වෙනුවට පොදු ප්රවාහනය භාවිතා කිරීම සහ වාහන බෙදාගෙන ගමන් කිරීම (Car sharing) දිරිමත් කරනු ලබයි.
ගුවන් ගමන් ක්ෂේත්රයේදී අත්යවශ්ය නොවන ගමන් මඟහැරීමට උපදෙස් දී ඇති අතර, දැනටමත් ඉන්ධන මිල ඉහළ යාම නිසා ගුවන් ටිකට්පත් මිල සීඝ්රයෙන් ඉහළ ගොස් පර්ත් සිට ලන්ඩන් දක්වා ගුවන් ගමන් සඳහා අමතර පැය 3ක් ගතවන බව වාර්තා වේ. ආහාර සුරක්ෂිතතාවය සම්බන්ධයෙන් ද දැඩි අවධානයක් යොමු වී ඇති අතර, ඉන්ධන සඳහා භාවිතා කරන LPG වායුව ඉවුම් පිහුම් වැනි අත්යවශ්ය කටයුතු සඳහා පමණක් වෙන් කිරීමට යෝජනා වී තිබේ. ඉන්දියාවේ ඇතැම් අවන්හල් ගෑස් හිඟය නිසා වසා දැමීමට සිදුව ඇති අතර යුරෝපීය රටවල් සිය බලශක්ති බදු අඩු කිරීමට පියවර ගෙන ඇත. තවද තෙල් මිල ඉහළ යාම නිසා ප්රවාහන වියදම් වැඩි වීමෙන් ඊජිප්තුව වැනි රටවල පාන් මිල ඉහළ ගොස් ඇති අතර රජය විසින් ඒ සඳහා උපරිම මිලක් පනවා ඇත.
