IMF හෝ ජිනිවා අප රටෙහි ව්‍යවස්ථා සංශෝධන කළයුතු බව කියා නොමැති බව පාර්ලිමේන්තු මන්ත්‍රී ඩබ්.ඩී.වීරසිංහ මහතා පවසයි.
ඒ මහතා මේ බව පැවසුවේ ශ්‍රි ලංකා පොදුජන පෙරමුණ පක්ෂ මූලස්ථානයේ අද (18) පැවති ප්‍රවෘත්ති සාකච්ඡාවට එක්වෙමිනි.
එහිදි පාර්ලිමේන්තු මන්ත්‍රී ඩබ්.ඩී.වීරසිංහ මහතා “අපි කැමතියි මේ රටට අලුත් ව්‍යවස්ථාවක් එනවානම්. 1978 න් පස්සේ අපේ රටේ ආණ්ඩුක්‍රම ව්‍යවස්ථාව විසි වතාවක් සංශෝධනය කරලා තිබෙනවා. ඒ සංශෝධනය කරලා තිබෙන්නේ මේ රටේ අභිවෘද්ධිය වෙනුවෙන් නොවේ, පුද්ගලයෙක් හෝ පක්ෂයක් ඉලක්ක කරගෙන. දේශපාලන නායකයින් සහ ජාතියක් ඉලක්ක කරගනිමින් තමයි ඒ ව්‍යවස්ථා සංශෝධන කරලා තිබෙන්නේ. දැන් මේ අවස්ථාවේත් එවැනි ව්‍යවස්ථා සංශෝධනයක් පාර්ලිමේන්තුවට ගෙන තිබෙනවා. මගේ පුද්ගලික මතය අපි කළ යුත්තේ පුද්ගලයෝ, පක්ෂය, නායකයෝ ඉලක්කරගෙන කරන ව්‍යවස්ථාවලින් මේ රටේ මිනිස්සුන්ට ගැලපෙන්නේ නැති බව. ගමේ මිනිස්සු ඉල්ලන්නේ තෙල්ටික, පොහොර ටික දෙන්න කියලා. මිනිස්සු වී වලට හොඳ මිලක් දෙන්න කියලයි ඉල්ලන්නේ. මොකක්ද මේ හදිසි වුවමනාව ව්‍යවස්ථා සංශෝධනයක් ගේන්න. IMF එකවත්, ජිනිවා වලවත්, කොතනකවත් කියලා නෑ අපේ රටේ ව්‍යවස්ථාව සංශෝධනය කල යුතුයි කියලා. අපි කැමතියි මේ රටේ අලුත් ව්‍යවස්ථාවක් හැදෙනවානම්. හැබැයි එය හැදෙනවානම් රටේ සංවර්ධනය, රටේ ජනතාවගේ අනාගතය, ආරක්ෂාව, ජාතික ආරක්ෂාව තහවුරු වන ව්‍යවස්ථාවක් විය යුතුයි. ඒ නිසා කෑලි අමුණන්නේ නැතිව අපි රටට ගැලපෙන ව්‍යවස්ථාවක් හදමු. ඒ වගේම දැන් ශ්‍රී ලංකා පොදුජන පෙරමුණ විදිහට අපි අපේ පක්ෂයේ ප්‍රතිසංවිධාන කටයුතු ආරම්භ කරලා තිබෙනවා. හැම පක්ෂයක්ම ඒ කටයුත්ත කරනවා. නමුත් අද අනෙකුත් දේශපාලන පක්ෂවලට ප්‍රධාන අභියෝගය වෙලා තිබෙන්නේ අපි අපේ පක්ෂයේ ප්‍රතිසංවිධානය කිරීමයි. නාවලපිටියේ අති සාර්ථකව රැස්වීමක් කළා. හැමෝම හිතුවා ශ්‍රී ලංකා පොදුජන පෙරමුණ වැටිලා කියලා. හැබැයි ගමට ගියාම තේරෙන්නේ මිනිස්සු අපිව අත ඇරලා නෑ කියලා. රටේ යම් ප්‍රශ්න තිබුණත් ඒවට ආණ්ඩු‍වක් විදිහට විසඳුම් දෙන්න උත්සහ කරමින් සිටිනවා. වර්තමාන ජනාධිපතිතුමාට අපි සහයෝග දක්වමින් තිබෙනවා. මේ බලය අල්ලන්න උත්සහ කරන දේශපාලන පක්ෂ වර්තමානයට ගැලපෙන, අනාගතයට ගැලපෙන ප්‍රතිපත්ති එක්ක යන පක්ෂ ද කියලා බලන්න. මේ දේශපාලන පක්ෂ තවම අවුරුදු 30 , 40 පැරණි දේශපාලන උපක්‍රම තමයි පාවිච්චි කරන්නේ බලය ලබාගන්න. ජනතා විමුක්ති පෙරමුණ උත්සහ කරන්නේ ප්‍රජාතන්ත්‍රවාදි විදිහට බලයට එන්න නොවේ. ඔවුන් හැමවෙලාවෙම මරලා, ගිනි තියලා බලය ලබා ගන්න උත්සහ කරන්නේ. ඒ අය කියනවා වෙනසක් කරන්න රටේ බලය දෙන්න කියලා. හැබැයි ඒ බලය ඉල්ලන අය තවම සාම්ප්‍රදායික විදිහට මේ රටේ ජනතාව අනුමත නොකරන ලෙස දේශපාලන බලය ලබා ගන්න පිරිසක්. නමුත් ශ්‍රී ලංකා පොදුජන පෙරමුණ විදිහට අපි ප්‍රජාතන්ත්‍රවාදි විදිහට දේශපාලනය කරන විට ඒ අය අපිට විරෝධය දක්වනවා. අපි තමයි පාර්ලිමේන්තුවේ බහුතර බලය තියෙන පක්ෂය. වර්තමාන ජනාධිපතිවරයාට අපි ඒ සහයෝගය දෙනවා. ප්‍රශ්නයක් තිබුණා. කොරෝනා වසංගතය , සහරාන්ගේ ප්‍රහාරයත් එක්ක ඒ වගේ විශාල කාරණා සංඛ්‍යාවක් හේතු වුණා මේ ආර්ථික ප්‍රශ්න ගොඩනැගෙන්න. ඒ නිසා අද අපි ජනාධිපතිතුමාට සහයෝගය ලබාදිලා අපි ආර්ථිකය යම්තාක් හොඳ තැනකට ගෙනාවා. අපි සහන දෙන්න පුළුවන් අවස්ථාවේදී සහන ලබා දෙනවා මේ රටේ ජනතාවට. අපි පුළුවන් විදිහට මේ ආර්ථික අර්බුදයෙන් ගොඩගැනීමට උත්සහ දරන අවස්ථාවේ අද විපක්ෂයේ සියලුදෙනා කියනවා මැතිවරණයක් තියන්න කියලා. අපි මැතිවරණය තියනවාට බය නෑ. හැබැයි මෙය එයට සුදුසු අවස්ථාවක් නොවේ. මේ අවස්ථාවේ අපි එකතුවෙලා රට හදන්න ඕන වෙලාවේ මැතිවරණයකට ගිහිල්ලා උ්ද්ඝෝෂණ කරලා කඩාකප්පල් කරනවා නම් මේ දේශපාලන පක්ෂ ගැන රටේ මිනිස්සු බලා ගන්න ඕන.” යැයි මන්ත්‍රී ඩබ්.ඩී.වීරසිංහ මහතා වැඩිදුරටත් කියා සිටියේය.
