ජාත්යන්තර මූල්ය අරමුදලේ (IMF) කළමනාකාර අධ්යක්ෂිකා ක්රිස්ටලීනා ජෝර්ජියේවා මහත්මිය දෙදින නිල සංචාරයක් සඳහා අද (16) ශ්රී ලංකාවට පැමිණෙයි. ලබන 18 වැනිදා දක්වා මෙරට රැඳී සිටින ඇය, සිය සංචාරය අතරතුර රජයේ ඉහළ පෙළේ නියෝජිතයන් සහ ප්රධාන පාර්ශවකරුවන් රැසක් හමුවී ද්විපාර්ශ්වික සාකච්ඡා පැවැත්වීමට නියමිතව ඇත.
මෙම සංචාරයේ විශේෂත්වයක් වන්නේ “දිට්වා” සුළි කුණාටුවෙන් ශ්රී ලංකාවට සිදු වූ ආර්ථික හා භෞතික බලපෑම පිළිබඳව ඇය සෘජුවම නිරීක්ෂණය කිරීමට සැලසුම් කර තිබීමයි. මෙරට යථා තත්ත්වයට පත් කිරීමේ කටයුතු සඳහා ජාත්යන්තර මූල්ය අරමුදලට ලබා දිය හැකි සහාය මෙන්ම, ශ්රී ලාංකිකයන් වෙනුවෙන් වඩාත් ස්ථාවර සහ ශක්තිමත් ආර්ථික අනාගතයක් ගොඩනගා ගැනීමට ගත යුතු ඉදිරි ක්රියාමාර්ග පිළිබඳව මෙහිදී දීර්ඝ වශයෙන් අවධානය යොමු කෙරෙනු ඇත.
පවතින මූල්ය වැඩසටහනේ ප්රගතිය සමාලෝචනය කිරීමටත්, ඉදිරි ණය වාරික නිදහස් කිරීම සම්බන්ධයෙන් රජයේ බලධාරීන් සමඟ සාකච්ඡා කිරීමටත් මෙම සංචාරය කදිම අවස්ථාවක් වනු ඇතැයි ආර්ථික විශේෂඥයෝ පෙන්වා දෙති. විශේෂයෙන්ම ආර්ථික ප්රතිසංස්කරණ ක්රියාවලිය මධ්යයේ මෙවැනි ඉහළ පෙළේ නියෝජිතවරියකගේ පැමිණීම ශ්රී ලංකාව කෙරෙහි ජාත්යන්තර විශ්වාසය තහවුරු කිරීමට ඉවහල් වනු ඇත.
