ඉරානය විසින් අවහිර කර ඇති හෝමූස් සමුද්ර සන්ධිය යළි විවෘත කිරීම සඳහා ඒකාබද්ධ හමුදාවක් පිහිටුවීම සම්බන්ධයෙන් අමෙරිකාව සමඟ කිසිදු ද්විපාර්ශ්වික සාකච්ඡාවක් පවත්වා නොමැති බව ඉන්දීය විදේශ කටයුතු අමාත්යාංශය අද (මාර්තු 16) ප්රකාශ කළේය. හෝමූස් සමුද්ර සන්ධිය විවෘත කිරීමේ සැලසුම් පිළිබඳව විමසූ අවස්ථාවක අමෙරිකානු බලධාරීන් ඉන්දියාවේ නම ද සඳහන් කිරීමත් සමඟ ඉන්දියාව මෙම පැහැදිලි කිරීම සිදු කර තිබේ.
නවදිල්ලියේ පැවැති මාධ්ය හමුවකදී අදහස් දක්වමින් ඉන්දීය විදේශ කටයුතු අමාත්යාංශ ප්රකාශක රන්දීර් ජයිස්වාල් මහතා සඳහන් කළේ හෝමූස් සමුද්ර සන්ධිය සම්බන්ධයෙන් විවිධ රටවල් ද්විපාර්ශ්විකව සාකච්ඡා පවත්වන බවට ඉන්දියාව දැනුවත් වුවද, ඉන්දියාව මෙතෙක් එවැනි කිසිදු සාකච්ඡාවකට එක්වී නොමැති බවයි. එමෙන්ම ඉන්දීය නාවික හමුදා නෞකා එවැනි මෙහෙයුමකට දායක කරන්නේද යන්න පිළිබඳවද ඔහු මෙහිදී සෘජු ප්රකාශයක් සිදු නොකළේය.
මේ අතර ඉන්දීය විදේශ කටයුතු අමාත්ය එස්. ජයශංකර මහතා ‘Financial Times’ පුවත්පතට ප්රකාශ කර තිබුණේ ඉරාන නිලධාරීන් සමඟ පැවැත්වූ සාකච්ඡාවල ප්රතිඵලයක් ලෙස ඇතැම් ඉන්දීය නෞකාවලට එම මුහුදු සන්ධිය හරහා යාමට අවස්ථාව හිමිවූ බවයි. කෙසේ වෙතත්, එය පොදු එකඟතාවක් නොව එක් එක් නෞකාව සඳහා තනි තනිව ලබාගත් අවසරයක් බවත්, තවත් ඉන්දීය නෞකා රැසක් එහි ගමන් කිරීමට ඇති බවත් ඔහු වැඩිදුරටත් සඳහන් කළේය. ලෝක තෙල් සැපයුමෙන් 20%ක් ගමන් කරන මෙම ප්රධාන නාවික මාර්ගය සති දෙකකට පෙර අමෙරිකා-ඊශ්රායල ප්රහාර ආරම්භ වීමත් සමඟ ඉරානය විසින් වසා දමනු ලැබීය.
