ඇමෙරිකාව, ඊශ්රායලය සහ ඉරානය අතර පවතින දරුණු යුද ගැටුම් හේතුවෙන් මැදපෙරදිග කලාපයේ සිරවී සිටි ඉන්දියානු ජාතිකයින් පිරිසක් අද (මාර්තු 03) දිල්ලිය වෙත පැමිණි අතර, ඔවුන් එහිදී සිය බියජනක අත්දැකීම් මාධ්ය වෙත විස්තර කර තිබේ
ඩුබායි සිට පැමිණි සුනිල් ගුප්තා නමැති මගියෙකු පවසා ඇත්තේ දිල්ලි ගුවන්තොටුපොළට යානය ගොඩබස්වන තෙක්ම තමන් දැඩි බියකින් සහ අවිනිශ්චිතතාවයකින් පසුවූ බවයි. තමා මීට පෙර මෙවැනි යුද වාතාවරණයකට මුහුණ දී නොමැති බැවින් පවුලේ අය සමඟ එක්වන තෙක් දැඩි කාන්සාවකින් පසුවූ බව ඔහු සඳහන් කළේය. පෙබරවාරි 28 වැනිදා ඇරඹි ප්රහාරවලින් පසු ඉරානය විසින් ඩුබායි සහ අබුඩාබි වැනි නගරවලට මෙන්ම ඇමෙරිකානු හමුදා කඳවුරුවලට ඩ්රෝන සහ මිසයිල ප්රහාර එල්ල කිරීම හේතුවෙන් එරට සාමාන්ය ජන ජීවිතයට සහ ගුවන් ගමන්වලට දැඩි බාධා එල්ල වී තිබුණි.
ඉන්දියාව සිය ජාතිකයින් මුදාගැනීම සඳහා විශේෂ සහන ගුවන් ගමන් (Relief Flights) ආරම්භ කර ඇති අතර, අද දිනය තුළ පමණක් එයාර් ඉන්දියා (Air India), ඉන්ඩිගෝ (IndiGo) සහ ස්පයිස්ජෙට් (SpiceJet) සමාගම් මගින් ගුවන් වාර කිහිපයක් ක්රියාත්මක කර ඇත. ඩුබායි සහ ජෙඩා (Jeddah) වැනි නගරවල සිරවී සිටි මගීන් සිය ගණනක් මෙම යානා මගින් යළි මව්බිමට පැමිණෙමින් සිටිති.
