මැදපෙරදිග කලාපයේ පවතින යුදමය වාතාවරණය හේතුවෙන් ඉන්දියාවේ පොහොර නිෂ්පාදනයට දැඩි බලපෑම් එල්ල වී ඇති අතර, එය මඟහරවා ගැනීම සඳහා චීනයෙන් යූරියා ලබා ගැනීමට ඉන්දියාව සාකච්ඡා ආරම්භ කර තිබේ. පර්සියානු බොක්ක ආශ්රිතව පවතින ගැටුම්කාරී තත්ත්වය හේතුවෙන් දියර ස්වභාවික වායු (LNG) සැපයුම අඩාල වීම නිසා ඉන්දියාවේ පොහොර කර්මාන්තශාලා රැසක් වසා දැමීමට සිදුවීම මීට ප්රධාන හේතුව වී ඇත.
ලොව විශාලතම යූරියා නිෂ්පාදකයා වන චීනය, සිය අපනයන සීමා කරමින් කෝටා ක්රමයක් (Quota system) ක්රියාත්මක කරන අතර, 2026 වසර සඳහා මෙතෙක් එම සීමාවන් ලිහිල් කර නොමැත. කෙසේ වෙතත්, ඉදිරි වගා කන්නය සඳහා අවශ්ය පොහොර තොග කඩිනමින් ලබා ගැනීමට ඉන්දීය බලධාරීන් චීනයෙන් විශේෂ ඉල්ලීමක් කර ඇති බව බ්ලූම්බර්ග් (Bloomberg) පුවත් සේවය වාර්තා කරයි.
මෙම පියවර ඉන්දියාව සහ චීනය අතර පවතින ආර්ථික සබඳතාවල යම් වර්ධනයක් පෙන්නුම් කරන බව දේශපාලන විචාරකයෝ පවසති. විශේෂයෙන්ම අසල්වැසි රටවල් සඳහා පනවා තිබූ ආයෝජන නීති ඉන්දියාව ලිහිල් කිරීමත් සමඟ, මෙම පොහොර ඉල්ලීම දෙරට අතර පවතින ආතතිකාරී වාතාවරණය මඳක් සමනය කිරීමට ඉවහල් වනු ඇතැයි අපේක්ෂා කෙරේ.
