ඉන්දියාවේ උත්තර ප්රදේශ් ප්රාන්තයේ මීරූට් (Meerut) නගරයේදී පසුගිය මාසයේ සිදුවූ අභිරහස් කාන්තා මිනීමැරුම සම්බන්ධයෙන් සිදුකළ විමර්ශනවලදී ඉතා තීරණාත්මක තොරතුරු රැසක් අනාවරණය වී තිබේ. ‘අර්චිතා අරෝරා’ යන ව්යාජ නමකින් පෙනී සිටිමින් ඉන්දියාවේ රැඳී සිටි මෙම කාන්තාව සැබවින්ම ටර්ක්මෙනිස්ථාන ජාතික ‘මුහබ්බත්’ (Muhabbat) නමැති තැනැත්තියක බව පොලිසිය තහවුරු කර ඇත.
පෙබරවාරි 21 වැනිදා මවානා කුර්ඩ් (Mawana Khurd) පොලිස් මුරපොළ අසලදී ඇයගේ සිරුර සොයාගනු ලැබූ අතර, සාක්ෂි විනාශ කිරීමේ අරමුණින් ඝාතකයින් ඇයගේ මුහුණට ඇසිඩ් ගසා විකෘති කර තිබුණි. කෙසේ වෙතත්, ඇයගේ මව වන නාෂ්මුඩිනෝවා ගුල්නාරා (Nazhmudinova Gulnara) විසින් වීඩියෝ ඇමතුමක් හරහා සිය දියණිය පැළඳ සිටි කරාබු හඳුනා ගැනීමෙන් පසු ඇයගේ අනන්යතාවය තහවුරු කර ගැනීමට හැකි විය.
පොලිස් පරීක්ෂණවලට අනුව, හෝටලයකදී මත්පැන් පානය කරමින් සිටියදී ඇතිවූ මුදල් ආරවුලක් මෙම ඝාතනයට හේතු වී තිබේ. එහිදී ඇතිවූ බහින්බස්වීමකදී ඇය තමන්ව දූෂණය කළ බවට චෝදනා කරන බවට තර්ජනය කිරීම නිසා, සැකකරුවන් ඇයට පහර දී රෙදි කඩකින් මිරිකා ඝාතනය කර ඇත.
මෙම ඝාතනය සම්බන්ධයෙන් චංචල් කුමාර් හෙවත් බන්ටි, ගුරුමුක් හෙවත් අර්වින්ද්, සංදීප් හෙවත් සිට්ටු සහ විවේක් හෙවත් කාකා යන පුද්ගලයින් සිව්දෙනා පොලිසිය විසින් අත්අඩංගුවට ගෙන තිබේ.
