මැදපෙරදිග කලාපයේ පවතින උග්ර යුදමය වාතාවරණය හමුවේ එහි වෙසෙන කිසිදු ඉන්දියානු ජාතිකයෙකු අතරමං වීමට ඉඩ නොදෙන බව ඉන්දීය අග්රාමාත්ය නරේන්ද්ර මෝදි මහතා අද (මාර්තු 11) ප්රකාශ කළේය. කේරළයේ කොචිහි පැවැති උත්සවයක් අමතමින් අග්රාමාත්යවරයා අවධාරණය කළේ, වර්තමාන ඉන්දියාව විදේශයන්හි සිටින තම පුරවැසියන් අත්නොහරින බවත්, ඔවුන්ගේ ආරක්ෂාව සහ සුභසාධනය වෙනුවෙන් රජය උපරිමයෙන් කැපවී සිටින බවත්ය.
ඉරානය සහ අමෙරිකාව අතර පවතින ගැටුම් හේතුවෙන් මැදපෙරදිග වෙසෙන දහස් සංඛ්යාත ඉන්දියානුවන්ගේ ආරක්ෂාව පිළිබඳව රජය දැඩි අවධානයෙන් පසුවන අතර, අදාළ රටවල් සමඟ එක්ව අවශ්ය සහයෝගීතා කටයුතු සම්බන්ධීකරණය කරමින් සිටින බව ද ඔහු පැවසීය. විශේෂයෙන්ම මෙම අසීරු අවස්ථාවේදී එහි වෙසෙන ඉන්දියානු ශ්රමිකයින් පිළිබඳව ඉතා ඉහළ මට්ටමකින් සොයා බලන ගල්ෆ් කලාපීය රටවලට සිය කෘතඥතාව පළ කරන බව ද අග්රාමාත්යවරයා මෙහිදී සඳහන් කළේය.
විදේශයන්හි සිටින ඉන්දියානු වැසියන්ගේ ආරක්ෂාව සම්බන්ධ කරුණු දේශපාලනීකරණය නොකළ යුතු බව පෙන්වා දුන් මෝදි මහතා, මේ සම්බන්ධයෙන් විපක්ෂය එල්ල කරන චෝදනා ද ප්රතික්ෂේප කළේය. මේ වන විට මැදපෙරදිග කලාපයේ පිහිටි ඉන්දීය තානාපති කාර්යාල හරහා එරට වෙසෙන ඉන්දියානුවන් සමඟ නිරන්තර සම්බන්ධතා පවත්වමින් අවශ්ය සියලු ආධාර සැපයීමට පියවර ගෙන ඇති බව ඉන්දීය රජයේ නිලධාරීහු තහවුරු කරති.
