ඉරාන යුද වාතාවරණය හේතුවෙන් ලෝක වෙළෙඳපොළේ බොරතෙල් සැපයුමට එල්ල වී ඇති බාධා හමුවේ, ඉන්දියාව සිය දේශීය ඉන්ධන මිල ස්ථාවරව පවත්වා ගැනීම සඳහා පෙට්රල් සහ ඩීසල් මත පනවා තිබූ විශේෂ නිෂ්පාදන බදු (Special Excise Duties) කැපී පෙනෙන ලෙස අඩු කිරීමට පියවර ගෙන තිබේ.
ඒ අනුව, පෙට්රල් ලීටරයක් සඳහා මෙතෙක් අය කළ රුපියල් 13ක විශේෂ බද්ද ඉන්දීය රුපියල් 3 දක්වා අඩු කර ඇති අතර, ඩීසල් ලීටරයක් සඳහා අය කළ රුපියල් 10ක බද්ද සම්පූර්ණයෙන්ම ඉවත් කර (ශුන්ය දක්වා) ඇත. අමෙරිකා-ඊශ්රායල සහ ඉරාන ගැටුම් හේතුවෙන් ලෝක බොරතෙල් ආනයනයෙන් 40%ක් සිදුවන හෝමුස් සමුද්ර සන්ධිය අඩපණ වීම නිසා ගෝලීය නැව් ගාස්තු සහ ඉන්ධන මිල ඉහළ යමින් පවතින පසුබිමක ඉන්දීය රජය මෙම තීරණය ගෙන තිබේ.
මෙම බදු කපා හැරීම හේතුවෙන් ඉන්දීය රජයට වාර්ෂිකව රුපියල් ට්රිලියන 1.55ක පමණ ආදායමක් අහිමි වනු ඇතැයි ආර්ථික විද්යාඥයෝ ඇස්තමේන්තු කරති. ඉන්දියාව සිය තෙල් අවශ්යතාවයෙන් 90%කට වඩා ආනයනය කරන බැවින්, ගෝලීය මිල උච්චාවචනයන්ගෙන් පාරිභෝගිකයා ආරක්ෂා කර ගැනීම සඳහා අගමැති නරේන්ද්ර මෝදිගේ රජය මෙම සහනය ලබා දී ඇත.
මීට අමතරව, ඉදිරි වගා සමය සඳහා අවශ්ය පොහොර සහ විදුලිය උත්පාදනයට අවශ්ය ගල් අඟුරු සැපයුම අඛණ්ඩව පවත්වා ගැනීමට අවශ්ය විධිවිධාන යොදා ඇති බව ද ඉන්දීය රජය අවධාරණය කරයි.
