පවතින ඉරාන යුද වාතාවරණය හමුවේ දැඩි මූල්ය පීඩනයකට ලක්ව සිටින ඉන්දීය ගුවන් සේවා සමාගම් වෙත සහනයක් ලබා දෙමින්, එරට ප්රධාන ගුවන්තොටුපොළවල ගොඩබෑමේ සහ නැවැත්වීමේ ගාස්තු (Landing and Parking charges) 25%කින් අඩු කිරීමට ඉන්දියාවේ ගුවන්තොටුපොළ ආර්ථික නියාමන අධිකාරිය (AERA) පියවර ගෙන තිබේ. මෙම ගාස්තු සහනය එරට දේශීය ගුවන් ගමන් සඳහා ඉදිරි මාස තුනක කාලසීමාව දක්වා බලපැවැත්වෙනු ඇත.
ඉන්දියාවේ ප්රමුඛතම ගුවන් සේවා සමාගම් වන IndiGo සහ Air India විසින් ඉදිරිපත් කළ ඉල්ලීමකට අනුව මෙම තීරණය ගෙන ඇති අතර, ඉරාන යුද්ධය සහ පකිස්ථාන ගුවන් සීමාව භාවිත කිරීමට පනවා ඇති තහනම හේතුවෙන් එරට ගුවන් සේවා ක්ෂේත්රය දැඩි අර්බුදයකට මුහුණ දී සිටී. ජාත්යන්තර ගුවන් ප්රවාහන සංගමයට (IATA) අනුව ගුවන් සමාගමක පිරිවැයෙන් තෙවන විශාලතම වියදම වන්නේ ගුවන්තොටුපොළ සහ ගුවන් ගමන් පාලන සේවා සඳහා වන ගාස්තුයි.
අමෙරිකාව සහ ඉරානය අතර සති දෙකක තාවකාලික සටන් විරාමයක් ප්රකාශයට පත් කිරීමත් සමඟ ගුවන් සේවා ක්ෂේත්රයට යම් අස්වැසිල්ලක් ලැබී ඇති පසුබිමක මෙම සහනය ප්රකාශයට පත් විය. මෙම තාවකාලික ගාස්තු අඩු කිරීම හේතුවෙන් ගුවන්තොටුපොළවලට සිදුවන ආදායම් අලාභය ඉදිරි ගාස්තු සමාලෝචනවලදී පියවා ගැනීමට කටයුතු කරන බව ද නියාමන අධිකාරිය වැඩිදුරටත් සඳහන් කර තිබේ.
