ඉන්දියාව ලෝක අර්ධ සන්නායක වෙළඳපොළේ ප්රබල සැපයුම්කරුවෙකු බවට පත් කිරීමේ අරමුණින්, අග්රාමාත්ය නරේන්ද්ර මෝදි (Narendra Modi) මහතා ඊයේ (31) ගුජරාටයේ සානන්ඩ් (Sanand) හිදී ‘කේන්ස් ටෙක්නොලොජි’ (Kaynes Technology) සමාගමට අයත් දැවැන්ත නිෂ්පාදන මධ්යස්ථානයක් විවෘත කළේය. මීට අමතරව ගුජරාට් ප්රාන්තය පුරා රුපියල් කෝටි 20,000කට අධික වටිනාකමකින් යුත් සංවර්ධන ව්යාපෘති රැසක් ද ජනතා අයිතියට පත් කරන ලදී.
රුපියල් කෝටි 3,300ක ආයෝජනයක් සහිතව ඉන්දීය අර්ධ සන්නායක මෙහෙයුම (India Semiconductor Mission) යටතේ ඉදිකළ මෙම කම්හලට දිනකට ඒකක මිලියන 6.33ක් නිෂ්පාදනය කිරීමේ හැකියාව පවතී. විවෘත කළ මුල් දිනයේ සිටම මෙයට විදෙස් අපනයන ඇණවුම් ලැබී ඇති බව අග්රාමාත්යවරයා අවධාරණය කළේය. මෙය තාක්ෂණික අතින් ඉන්දියාව ස්වයංපෝෂිත කිරීමේ තීරණාත්මක සන්ධිස්ථානයක් ලෙස සැලකේ.
රුපියල් කෝටි 5,100ක පිරිවැයක් දරා ඉදිකළ අහමදාබාද්-ධෝලේරා (Ahmedabad-Dholera) අධිවේගී මාර්ගය ද අග්රාමාත්යවරයා අතින් විවෘත විය. මීට අමතරව මාර්ග, දුම්රිය, බලශක්ති, ජල සම්පාදන සහ නාගරික සංවර්ධන ව්යාපෘති රැසක් ද මෙයට ඇතුළත් වේ. ගුජරාට් ප්රාන්තය නුදුරු අනාගතයේදී ලෝකයේ ප්රධානතම පුනර්ජනනීය බලශක්ති මධ්යස්ථානයක් බවට පත්වනු ඇති බව ද ඔහු මෙහිදී විශ්වාසය පළ කළේය.
