ඉන්දියාවේ විශාලතම ගුවන් සේවය වන ‘IndiGo’ හි ප්රධාන විධායක නිලධාරී පීටර් එල්බර්ස් මහතා වහාම ක්රියාත්මක වන පරිදි සිය ධුරයෙන් ඉල්ලා අස්වී තිබේ. පසුගිය වසර අගභාගයේදී එම ගුවන් සේවය මුහුණ දුන් දැවැන්ත ගුවන් ගමන් අවලංගු කිරීමේ අර්බුදයෙන් මාස කිහිපයකට පසු මෙම ඉල්ලා අස්වීම සිදුවීම විශේෂත්වයකි. එල්බර්ස් මහතා “පෞද්ගලික හේතූන්” මත ඉල්ලා අස්වන බව ගුවන් සමාගම නිවේදනය කළ ද, පසුගිය දෙසැම්බර් මාසයේදී ගුවන් වාර 4,500ක් පමණ අවලංගු වීම නිසා ඇති වූ දැඩි විවේචන මීට බලපා ඇති බව වාර්තා වේ.
නියමුවන්ගේ විවේක කාලය පිළිබඳ නව නීති හඳුන්වා දීමෙන් පසු, අවශ්ය නියමුවන් සංඛ්යාව නිසි ලෙස කළමනාකරණය කර ගැනීමට අපොහොසත් වීම නිසා ඉන්ඩිගෝ ඉතිහාසයේ දරුණුතම ගුවන් ගමන් බිඳවැටීම සිදු විය. මේ හේතුවෙන් ඉන්දීය ගුවන් සේවා නියාමන ආයතනය විසින් සමාගමට ඩොලර් මිලියන 2.45ක දඩයක් ද පනවන ලදී. නව ප්රධාන විධායක නිලධාරියෙකු සොයා ගන්නා තෙක් සමාගමේ සම-නිර්මාතෘ රාහුල් භාටියා (Rahul Bhatia) මහතා අතුරු පාලකයා ලෙස කටයුතු කරනු ඇත. “පසුගිය දෙසැම්බරයේ සිදු වූ දේ කිසිසේත් සිදු නොවිය යුත්තක්” බව ඔහු සිය සේවකයින් වෙත දන්වා තිබේ.
2022 වසරේදී ඉන්ඩිගෝ සමඟ සම්බන්ධ වූ එල්බර්ස් මහතාගේ කාලය තුළ එයාර්බස් (Airbus) සමාගම වෙත ගුවන් යානා 500ක දැවැන්ත ඇණවුමක් ලබා දීමට ද පියවර ගෙන තිබුණි. ඉන්දියාවේ දේශීය ගුවන් ගමන් වෙළඳපොළෙන් තුනෙන් දෙකක පමණ පංගුවක් හිමි ඉන්ඩිගෝ ගුවන් සේවය තුළ සිදුවන මෙවැනි ඉහළ පෙළේ වෙනස්කම් එරට ගුවන් ගමන් ක්ෂේත්රයේ ස්ථාවරත්වයට බෙහෙවින් බලපානු ඇත.
