පසුගිය සිකුරාදා (මාර්තු 06) හෝමුස් සමුද්ර සන්ධියේදී එක්සත් අරාබි එමීර් රාජ්යයේ ධජය යටතේ යාත්රා කළ ‘Musaffah 2’ නම් ටග් යාත්රාව (Tugboat) ගිලී යාමෙන් එහි සිටි ඉන්දුනීසියානු ජාතිකයින් තිදෙනෙකු අතුරුදහන් වී ඇති බව ඉන්දුනීසියානු විදේශ අමාත්යාංශය නිවේදනය කරයි. පෙබරවාරි 28 වනදා ආරම්භ වූ යුදමය වාතාවරණයත් සමඟ මෙම කලාපය හරහා ගමන් කරන නෞකා ඉලක්ක කරගනිමින් එල්ල වන ප්රහාර මාලාවක නවතම සිදුවීම මෙය වේ.
ඉන්දුනීසියාව, ඉන්දියාව සහ පිලිපීනය යන රටවලට අයත් සත් දෙනෙකුගෙන් යුත් කාර්ය මණ්ඩලයක් මෙම යාත්රාවේ සිට ඇති අතර, ඉන් සිව් දෙනෙකු බේරා ගැනීමට සමත්ව තිබේ. ආරක්ෂක අංශ වාර්තාවලට අනුව, මෙම ටග් යාත්රාව මීට පෙර මිසයිල ප්රහාරයකට ලක්ව තිබූ මෝල්ටා ධජය සහිත ‘Safeen Prestige’ නම් බහාලුම් නෞකාවට සහාය වීමට උත්සාහ කරමින් සිටියදී මිසයිල ප්රහාර දෙකකට ලක්ව ඇත. එම ප්රහාරයන් හේතුවෙන් යාත්රාව තුළ පිපිරීමක් සිදුව ගිනි ගැනීමෙන් අනතුරුව එය මුහුදේ ගිලී තිබේ.
බේරාගත් පිරිස අතර සිටින එක් ඉන්දුනීසියානු ජාතිකයෙකු පිළිස්සුම් තුවාල සහිතව ඕමානයේ ඛසාබ් (Khasab) නුවර රෝහලක ප්රතිකාර ලබන බව වාර්තා වේ. අතුරුදහන් වූ සෙසු පිරිස සෙවීම සඳහා ප්රදේශයේ බලධාරීන් සෝදිසි මෙහෙයුම් අඛණ්ඩව ක්රියාත්මක කරන අතර, සිද්ධිය සම්බන්ධයෙන් වැඩිදුර පරීක්ෂණ පවත්වාගෙන යනු ලැබේ. මෙම සිදුවීමත් සමඟ හෝමුස් සමුද්ර සන්ධිය හරහා සිදුවන නාවික ගමනාගමනයේ ආරක්ෂාව පිළිබඳව ජාත්යන්තර මට්ටමින් දැඩි අවධානයක් යොමුව තිබේ.
