බ්රිතාන්යයේ ප්රමුඛ පෙළේ තොරතුරු තාක්ෂණ උපදේශන ආයතනයක් වන Inextricable Group, සිය ඩිජිටල් සහ පරිවර්තන අංශයේ (Digital and Transformation) ජ්යෙෂ්ඨ උප සභාපතිවරයා ලෙස ප්රවීණ ක්ෂේත්ර නායකයෙකු වන ජයන්ත පීරිස් මහතා පත් කළ බව නිවේදනය කර තිබේ.
ජයන්ත පීරිස් මහතා ශ්රී ලංකාවේ MAS Holdings සමාගම ගෝලීය මට්ටමේ නිෂ්පාදන දැවැන්තයෙකු බවට පත් කිරීම සඳහා වසර 30කට අධික කාලයක් සුවිශේෂී දායකත්වයක් ලබා දුන් පුද්ගලයෙකි. එහි ප්රධාන තොරතුරු නිලධාරී (CIO) ලෙස කටයුතු කරමින්, එම සමාගමේ ඩිජිටල් ව්යුහය නවීකරණය කිරීම සහ ERP (Enterprise Resource Planning) පද්ධති මෙන්ම රොබෝ තාක්ෂණය (RPA) වැනි නවීන තාක්ෂණයන් හඳුන්වා දීමට ඔහු නායකත්වය ලබා දී ඇත.
මෙම පත්වීමත් සමඟ ජයන්ත පීරිස් මහතා, Hugo Boss Textile Industries හි හිටපු කළමනාකාර අධ්යක්ෂවරයෙකු වන ජෝකිම් හෙන්ෂ් (Joachim Hensch) මහතා සමඟ එක්ව කටයුතු කරනු ඇත. හෙන්ෂ් මහතා ලොව පිළිගත් ‘Industry 4.0’ (සිව්වන කාර්මික විප්ලවය) පිළිබඳ විශේෂඥයෙකි. මෙම දෙපළගේ ඒකාබද්ධ නායකත්වය හරහා ඇඟලුම් සහ නිෂ්පාදන ක්ෂේත්රයේ ආයතනවල සැපයුම් දාම කාර්යක්ෂමතාව ඉහළ නැංවීමටත්, AI (කෘතිම බුද්ධිය) සහ ස්වයංක්රීයකරණය වැනි තාක්ෂණයන් භාවිත කරමින් ව්යාපාරික දියුණුව ළඟා කර ගැනීමටත් අපේක්ෂා කෙරේ.
Inextricable Group හි ප්රධාන විධායක නිලධාරී සංජේ චෞහාන් (Sanjay Chauhan) මහතා සඳහන් කළේ, තාක්ෂණය යනු හුදෙක් උපකරණයක් පමණක් නොව ව්යාපාරික උපාය මාර්ග ජය ගැනීමට ඇති ප්රධානතම මෙවලම බව ජයන්ත පීරිස් මහතාගේ පැමිණීමත් සමඟ තවදුරටත් තහවුරු වන බවයි.
