ලෝක බලශක්ති සැපයුමෙන් පහෙන් එකක් (1/5) ගමන් කරන හෝමූස් සමුද්ර සන්ධිය (Strait of Hormuz) හරහා “සතුරු නොවන” (Non-hostile) නෞකාවලට ආරක්ෂිතව ගමන් කිරීමට අවසර ලබා දෙන බව ඉරානය අද (2026 මාර්තු 25) නිල වශයෙන් නිවේදනය කළේය. පෙබරවාරි 28 වැනිදා ආරම්භ වූ අමෙරිකා-ඉරාන යුද්ධය හේතුවෙන් මෙම මුහුදු මාර්ගය අවහිර වීම නිසා ලෝකයම දරුණු බලශක්ති අර්බුදයකට මුහුණ දී සිටින පසුබිමක මෙම තීරණය ගෙන තිබේ.
එක්සත් ජාතීන්ගේ සංවිධානයේ ඉරාන දූත මණ්ඩලය ප්රකාශ කරන්නේ ඉරානයට එරෙහි ආක්රමණවලට සහාය නොදක්වන සහ ඉරාන ආරක්ෂක රෙගුලාසිවලට අනුකූල වන නෞකාවලට පමණක් මෙම අවස්ථාව හිමි වන බවයි. යුද්ධය ආරම්භ වීමට පෙර දිනකට නෞකා 120ක් පමණ මෙම මාර්ගය භාවිත කළ ද, දැනට එය දිනකට නෞකා 5ක් දක්වා සීමා වී ඇත. කෙසේ වෙතත්, ඉරානයේ මෙම ලිහිල් පිළිවෙත සහ අමෙරිකානු ජනාධිපති ඩොනල්ඩ් ට්රම්ප් විසින් ඉදිරිපත් කළ කරුණු 15ක සාම සැලැස්ම පිළිබඳ පුවත් හේතුවෙන් ලෝක වෙළඳපොළේ බොරතෙල් මිල (Brent crude) අද දිනයේ 9% කින් පමණ පහත වැටී ඇති අතර ආසියානු කොටස් වෙළඳපොළවල් ද ඉහළ ගොස් තිබේ.
