ඉරානයේ ‘බසීජ්’ (Basij) පැරමිලිටරි බලකායේ ප්රධානී ගොලම්රේසා සොලෙයිමානි (Gholamreza Soleimani) ඇතුළු ඉහළ පෙළේ අණදෙන නිලධාරීන් පිරිසක් ඊයේ රාත්රියේ එල්ල වූ ඉශ්රායල ගුවන් ප්රහාරයකින් ජීවිතක්ෂයට පත්ව ඇති බව ඉශ්රායල ආරක්ෂක අංශ (IDF) තහවුරු කරයි. මීට පෙර එල්ල වූ ප්රහාර හමුවේ සිය මූලස්ථාන අහිමි වීම නිසා බසීජ් බලකාය විසින් අලුතින් පිහිටුවා ගන්නා ලද තාවකාලික කඳවුරක් ඉලක්ක කර ගනිමින් මෙම ප්රහාරය එල්ල වී තිබේ. සොලෙයිමානිට අමතරව එම බලකායේ නියෝජ්ය අණදෙන නිලධාරියා ද මෙම ප්රහාරයෙන් මියගොස් ඇති බව වාර්තා වේ.
මීට අමතරව ඉරාන රජයේ ඉහළ පෙළේ නිලධාරියෙකු වන අලි ලරිජානි (Ali Larijani) ඉලක්ක කර ගනිමින් ද ටෙහෙරාන් නුවරදී ප්රහාරයක් එල්ල වී ඇති අතර, එහි ප්රතිඵලය මෙතෙක් තහවුරු වී නොමැත. එසේම පලස්තීන ඉස්ලාමීය ජිහාඩ් සංවිධානයේ නායක අක්රම් අල්-අජූරි (Akram al-Ajouri) ඉලක්ක කර ගනිමින් බදාදා එල්ල කළ ප්රහාරයකින් ඔහු ද බොහෝ දුරට ජීවිතක්ෂයට පත්වන්නට ඇති බව ඉශ්රායල හමුදාව විශ්වාසය පළ කරයි. මැදපෙරදිග යුද ගින්න මෙලෙස දරුණු ලෙස ඇවිළෙමින් පවතින පසුබිමක ලෝක වෙළඳපොළේ බොරතෙල් මිල බැරලයකට ඩොලර් 103 මට්ටමේ පවතින අතර, මෙරට තුළ ද ඉන්ධන පිරිමැසීම සඳහා රජයේ කාර්යාලවලට බදාදා නිවාඩුව ඇතුළු විශේෂ රෙගුලාසි පනවා තිබේ.
යුද වාතාවරණය හේතුවෙන් ගුවන් ගමන් අඩාල වීම නිසා ප්රංශ සංචාරකයන් 2,000කට අධික පිරිසක් ශ්රී ලංකාව තුළ සිරවී සිටින බව ද නවතම වාර්තා පෙන්වා දෙයි. පවතින හදිසි තත්ත්වය සැලකිල්ලට ගෙන ඉන්ධන සහ ගෑස් ආනයනය කිරීමේදී සාමාන්ය ප්රසම්පාදන ක්රමවේදවලින් බැහැරව කටයුතු කිරීමට ද රජය අනුමැතිය ලබා දී ඇත.
