‘Epic Fury’ මෙහෙයුමෙන් මැදපෙරදිග දැවැන්ත යුද ගිනිදැල් ඇවිලෙයි
අමෙරිකානු එක්සත් ජනපදය සහ ඊශ්රායලය ඒකාබද්ධව දියත් කළ ‘Operation Epic Fury’ නමැති දැවැන්ත ගුවන් මෙහෙයුමෙන් ඉරාන උත්තරීතර නායක අයතුල්ලා අලි කමේනි ජීවිතක්ෂයට පත්ව ඇති බව ඉරාන රජයට හිතවාදී ප්රධාන පුවත් සේවා වන ‘තස්නිම්’ (Tasnim) සහ ‘ෆාර්ස්’ (Fars) යන ආයතන නිල වශයෙන් තහවුරු කර තිබේ. මීට පෙර අමෙරිකානු ජනාධිපති ඩොනල්ඩ් ට්රම්ප් සහ ඊශ්රායල ආරක්ෂක අංශ විසින් මෙම ඝාතනය පිළිබඳ ප්රකාශ සිදු කළ ද, ඉරාන බලධාරීන් මුලදී එය ප්රතික්ෂේප කරනු ලැබීය. එහෙත් දැන් ඉරානයෙන් ලැබෙන නිල වාර්තා අනුව තහවුරු වන්නේ, උත්තරීතර නායකයා ඇතුළු එරට ආරක්ෂක අමාත්යවරයා සහ විප්ලවීය ආරක්ෂක බලකායේ (IRGC) ප්රධාන අණදෙන නිලධාරීන් ඇතුළු ඉහළ පෙළේ නායකයින් 40 දෙනෙකු පමණ මෙම ප්රහාරවලින් ඝාතනය වී ඇති බවයි.
මෙම ඓතිහාසිකමය මෙහෙයුමට ප්රතිචාර වශයෙන් ඉරානය විසින් සිය ගණනක බැලිස්ටික් මිසයිල සහ ඩ්රෝන ප්රහාර මාලාවක් ඊශ්රායලය සහ මැදපෙරදිග පිහිටි අමෙරිකානු හමුදා කඳවුරු ඉලක්ක කර ගනිමින් දියත් කර තිබේ. මෙම ප්රහාරවලින් බහරේනයේ පිහිටි අමෙරිකානු 5 වන නාවික බලඇණි මූලස්ථානයට මෙන්ම කුවේටය, කටාර් සහ එක්සත් අරාබි එමීර් රාජ්යයට ද හානි සිදුව ඇති බව වාර්තා වේ. විශේෂයෙන් ඩුබායි සහ අබුඩාබි ජාත්යන්තර ගුවන්තොටුපළ වෙත ප්රහාර එල්ල වීමත් සමඟ කලාපයේ ගුවන් ගමන් දින නියමයක් නොමැතිව අත්හිටුවා ඇති අතර, ඩුබායි හි සුඛෝපභෝගී හෝටල් ද ඉරාන මිසයිල ප්රහාර හේතුවෙන් ගිනිගෙන ඇති බව විදෙස් මාධ්ය තහවුරු කරයි.
ප්රහාර හමුවේ ඉරානය පුරා පළාත් 24ක පුද්ගලයන් 200කට අධික පිරිසක් මියගොස් ඇති අතර, මිනාබ් නගරයේ බාලිකා පාසලකට එල්ල වූ ප්රහාරයකින් දරුවන් 115 දෙනෙකු පමණ ජීවිතක්ෂයට පත්වීම දැඩි මානුෂීය අර්බුදයක් නිර්මාණය කර තිබේ. ඉරානය තුළ රජය විසින් අන්තර්ජාලය සම්පූර්ණයෙන්ම විසන්ධි කර තිබුණ ද, උත්තරීතර නායකයාගේ අභාවය පිළිබඳ පුවතත් සමඟ සමහර ප්රදේශවල ජනතාව සැමරුම් පවත්වන ආකාරය ද, තවත් පිරිසක් යුද බිය හේතුවෙන් නගර අතහැර පලා යන ආකාරය ද දක්නට ලැබේ. ඊශ්රායලයේ ටෙල් අවිව් නගරයට ද ඉරාන මිසයිල පතිත වී ඇති අතර ඉන් සිවිල් වැසියන් පිරිසක් තුවාල ලබා තිබේ.
ජාත්යන්තර වශයෙන් රුසියාව සහ චීනය මෙම මෙහෙයුම දැඩි ලෙස හෙළා දකිමින් එය අසාධාරණ ආක්රමණයක් ලෙස හඳුන්වා දී ඇති අතර, යුක්රේනය සහ කැනඩාව වැනි රටවල් අමෙරිකානු සහ ඊශ්රායල ක්රියාමාර්ගය සාධාරණීකරණය කරමින් සහාය පළ කර ඇත. එක්සත් ජාතීන්ගේ ආරක්ෂක මණ්ඩලය වහාම සටන් විරාමයක් ඉල්ලා සිටියද, ජනාධිපති ට්රම්ප් අවධාරණය කර ඇත්තේ අමෙරිකානු යුද අරමුණු සම්පූර්ණයෙන් ඉටුවන තෙක් ඉදිරි සතිය පුරා මෙම ප්රහාර අඛණ්ඩව දියත් කරන බවයි. මෙම තත්ත්වය හමුවේ හෝමුස් සමුද්ර සන්ධිය වසා දැමීමට ඉරානය පියවර ගැනීමත් සමඟ ගෝලීය තෙල් මිල ඉහළ යාමේ සහ බලශක්ති අර්බුදයක් ඇති වීමේ දැඩි අවදානමක් ද මතුව තිබේ.
